Sápmi |

Guldal jiena: Giellačeahppi Jevgenij Jushkov lei dehálaš liŋka Ruošša beale sámiid ja eará Sámi gaskkas

Giellačeahppi, jorgaleaddji ja dulka Jevgenij Jushkov lea vádjolan.

Video: Jevgenij Jushkov
Jevgenij Jushkov vádjoleamis muitaledje davviriikalaš Ođđasiin ikte vuossárgga 30.11.2020. Ođđasa kommenterii maid Sámiráđi presideanta Christina Henriksen. Video: Ođđasat

Sotnabeaivve ollii morašsáhka Sápmái, go guokte olbmo leat duššan biilastálla buollimis Lujávrris, Ruošša beale Sámis. Ruošša beale Sámi dehálaš liŋka ja giellačeahppi Jevgenij Jushkov lei nubbi dain, guhte duššai dán buollimis. Bolesat navdet buollima vearredahkun ja sii dutket ášši, muitala NRK Sápmi.

Jushkov lei dovddus giellačeahppi, jorgaleaddji ja dulka, gii barggai maid máŋggaid jagiid Sámiráđis. Jushkov lea orron ovdamearkka dihte Ohcejogas ja Kárášjogas ja son lea studeren Sámi allaskuvllas, Guovdageainnus.

– Sápmi lea geafit, go son ii leat šat. Son lea leamašan hui dehálaš Sámi ovttasbargui, dadjá Sámiráđi presideanta Christina Henriksen davviriikalaš Sámi Ođđasiidda.

Lei dehálaš veahkki sámeradioid ovttasbarggus

Yle Sámi radio ovddeš guhkesáigásaš hoavda Juhani Nousuniemi dovddai Jevgenij Jushkov ja sus lea stuorra moraš, go Jushkov lea dál vádjolan. Nousuniemi govvida Jushkov váibmoláđisin ja čeahppin.

– Das lea sullii moaddelot jagi áigi, go mis lei dakkár stuorra prošeakta Davviriikkaid sámeradioin, ahte mis lei jurdda veahkehit ja hukset Guoládaga sámeradio buoret dillái, ja dalle mun deiven Jevgenij vuosttaš geardde. Son lei dakkár hui ráfálaš moddjás almmái ja čeahppi dulkot, dadjá Nousuniemi.

Jushkov hálddašii máŋga giela ja dan dihte son lei dehálaš veahkki oažžut dieđuid Ruošša beali Sámis. Ovttasbargu ii livččii lihkostuvvan nu bures su haga.

– Son máhtii sámegiela, ruoŧagiela, ruoššagiela, eaŋgalasgiela ja son dovddai Ruošša servodaga, mo dat doaibmá, ja byrokratiija, mii doppe lea. Son lei oalle dehálaš bargi ja veahkki, ahte mii oaččuimet oppa dan hommá johtui, muittaša Nousuniemi.

Yle Saamen entinen päällikkö Juhani Nousuniemi
Yle Sámi radio guhkesáigásaš hoavda Juhani Nousniemi mielde Jevgenij Jushkov lei váibmoláđis olmmoš, gii lei hui čeahppi máŋgga áššis. Govva: Ritva Torikka / Yle

Dehálaš gáldu Ruošša beale Sámi dilis

Ovtta gaskka Jushkov orui maid Ohcejogas.

– Jevgenij orui mu muittu mielde jagi goittotge Ohcejogas ja dien láhkai doaimmai vuot liŋkan min Sámi ja Guoládaga Sámi gaskkas, go sus lei duođaige dat gielladáidu ja earáge čehppodat. Son lei dán láhkai vuot čatnamin Guoládaga Sámi eará Sápmái, muitala Nousuniemi.

Jushkov ii lean ieš politihkkár, muhto son čuovui hui dárkilit, mii servodagas dáhpáhuvvá. Son lei dehálaš gáldu, go lei sáhka dábálaš árgabeaivvis Lujávrris dahje ovdamearkka dihte Ruošša politihkalaš dilis.

Giellačeahppi ja dulka Jevgenij Jushkov lea vádjolan eret. Son jámii buollimis ruoktogilistis Guoládatnjárgga Lujávrris. Jushkov lei oahpis sámečoahkkimiin, gos ain viidábut sápmelaččat čoahkkanedje – erenomážit Sámiráđi doaimmain. Ovtta áigodaga son lei maiddái Yle Sámi veahkkebargin Lujávrris. Sámeradio guhkesáigásaš hoavda Juhani Nousuniemi barggai ollu ovttas Jushkoviin, earret eará Guoládaga Sámi radio prošeavttas ja sámeradioid konfereanssain. Jietna: Jouni Aikio / Yle

Varrasamosat: Sápmi

Váldoođđasat

Varrasamosat

Muualla Yle.fi:ssä