Sápmi |

Guldal jiena: Helga West oaččui gudnemáinnašumi ođđa kritihkkariid čállingilvvus – ”Jus mis váilu dáiddakritihkka, de dat čuohcá demokratiijai”

Helga West áigu kritihkkačállosiiddis bokte čalmmustahttit sámegirjjálašvuođa váldoservodahkii.

Helga West
Helga West mielas kritihkar ii leat makkárge duopmár, baicce muhtinlágan ovdalohkki, gii árvvoštallá girjji dahje dáiddalaš buktaga iežas ámmátdáiddu bokte Govva: Mikko Mäntyniemi

Diktačálli ja teologa Helga West lea ožžon gudnemáinnašumi Runografi ordnen Debytoi kriitikkona -čállingilvvus, mas galggai čállit kritihkka muhtin diktagirjjis. West searvvai gilvui suomagielat kritihkkačállosiin, man son lei čállán Inger-Mari Aikio diktagirjjis 69 čuoldda.

Debytoi kriitikkona -gilvvu vuittii Veera Kiurujoki.

Čállingilvu lei oaivvilduvvon dakkáriidda, geat eai ámmátlaččat čále kritihkaid. West jáhkká, ahte gudnemáinnašupmi rahpá sutnje uvssaid diktamáilmmis.

– Gal dat lei munnje stuorra ášši oažžut dákkár gudnemáinnašumi, go mun in leat vázzán makkárge girjjálašvuođa skuvllaid, dego máŋgasat dien suorggis leat ja eandalit dakkárat, geat čállet girjjálašvuođa kritihkaid ja girjeárvvoštallamiid. Dat lei buorre vuohki oažžut vásáhusa, muhto maiddái vejolašvuohta searvat diktaservošii ja olbmuid jovkui, geat čállet kritihkaid, dadjá West.

Gudni ja máidnuma lassin West beassá giđa rájes almmustahttit kritihkkačállosiid Runografi neahttasiiddu bokte. Neahttasiidu ii leat vel rahpasan, muhto giđa mielde doppe lea vejolaš lohkat nu West gilvočállosa go earáge kritihkaid. Ulbmilin sus lea čalmmustahttit sámegirjjálašvuođa.

– Mun lean namalassii beroštuvvan sámegirjjálašvuođas, dat lea álot geasuhan hui olu. Jus mun sáhtán dan mo nu láhkai loktet Suoma servošis, de mun livččen hui ilolaš. Máŋgasat smihttet, ahte sámegirjjálašvuohta ii gula dakkár genrei dego ruovtturiikka girjjálašvuohta, muhto sámegirjjálašvuohtahan gullá Suoma girjjálašvuhtii maiddái, dadjá West.

Girjjálašvuohta geasuha ain eanet

Helga West almmuhii jagis 2018 vuosttaš diktagirjjis, Gádden muohttaga vielgadin. Vaikko West leage bargamin dál teologa nákkosgirjjiin, de girjjálašvuođa máilbmi geasuha su ain eanet. Kritihkkačállimis su beroštahttá namalassii dat, ahte dat lea iehčanas dáiddabargu.

– Dat lea dáiddabargu, mas don kommenteret dihto eará dáiddabarggu, muhto nu, ahte das boahtá dakkár iehčanas bargu, mii dego čállá dahje hukse dakkár iežas máilmmi. Ovdal lei nu, ahte kritihkkačálli fertii mo nu láhkai dadjat, ahte leago dát buorre girji vai ii. Dat lea áibba dakkár boarásmuvvan oaidnu, čilge West.

Kritihkar ii leat makkárge duopmár, baicce muhtinlágan ovdalohkki, gii árvvoštallá girjji iežas ámmátdáiddu bokte, oaivvilda West.

– Jus mis váilu dáiddakritihkka, de dat čuohcá demokratiijai. Dat čatnasa sátnefriddjavuhtii ja eará árvvuide, de dan dihtii mii dárbbašit kritihka ja kritihkkariid, dadjá Helga West.

Loga dás Helga West vuosttaš sámegielat kritihka ja girjeárvvoštallama, man Yle Sápmi almmustahtii jagis 2018.

Diktačálli ja teologa Helga West lea ožžon gudnemáinnašumi Runografi ordnen Debytoi kriitikkona -čállingilvvus, mas galggai čállit kritihkka muhtin diktagirjjis. Jietna: Anni-Saara Paltto / Yle Sápmi

Varrasamosat: Sápmi

Váldoođđasat

Varrasamosat

Muualla Yle.fi:ssä