Sápmi |

Guldal jiena: Ijahis Idja lea bivnnut ovtta jagi bottu maŋŋá – bileahtavuovdin lea vuolgán bures johtui

Vaikko Ijahis Idja -festiválas lea dán jagi dušše okta festiválabeaivi, de lea bileahtavuovdin vuolgán bures johtui, dadjá Ijahis Ija veahkkebuvttadeaddji Aleksi Ahlakorpi.

Ijahis Idja on musiikkifestivaali Inarissa.
Ijahis Idja lágiduvvo borgemánu 14. beaivve. Amoc ja Ailu Valle časkiba vuimmiideaskka oktii festiválalávddis ođđa musihkain. Govva: Vesa Toppari / Yle

Guldal dás, mo Ijahis Idja -festivála ovdána. Jietna: Jouni Aikio

Álgoálbmogiid musihkkafestivála Ijahis Idja ordnejuvvo borgemánu 14. beaivve Anáris. Vaikko korona vel ráđđe Sámis ja máilmmis, de orru festiválas šaddamin bivnnut.

Ijahis Ija veahkebuvttadeaddji Aleksi Ahlakorpi dadjá, ahte olbmot leat oastán bures bileahtaid, vaikko daid lea leamaš vejolaš oastit dušše vuollái vahku.

Ahkakorpi jáhkká, ahte johtolat ja sisabeassan festivála guvlui doaibmá ollu jođánit dán jagi go ovdal.

– Elektronalaš bileahtaid oastin ovddalgihtii váikkuha dasa. Daid lea álki čájehit ovdamearkka dihte telefovnna šearpmas, namuha Ahlakorpi.

Korona lea váikkuhan ordnemiidda

Koronadili dihte Ijahis Ijas lea okta festiválabeaivi, ja Ahlakorpi mielde pandemiija lea váikkuhan juohke áššái festivála ordnemiin. Son dadjá, ahte leat ovdamearkka dihte dievva áššit, maid galgá dál váldit vuhtii ja main ii dárbbašan beroštit guokte jagi dassái. Ráddjehusaid dihte dilli maid sáhttá rievdat viehka johtilit.

Ahlakorpi dadjá, ahte sii leat čuvvon dárkilit mearrádusaid ja njuolggadusaid olles geasi. Son lea goit duđavaš das, ahte eiseválddit leat almmuhan mearrádusaid bures ovddalgihtii, nu ahte nuppástusaide geargá ráhkkanit.

Eaktodáhtolaš bargiide lea vel dárbu

Stuorra oasi Ijahis Ija bargiin leat eaktodáhtolaččat. Ahlakorpi muitala, ahte sii leat ainge ohcamin lasi eaktodáhtolaččaid. Dán jagi eai leat leamašan seamma ollu ohccit go ovddit jagiid.

Sii leat dán jagi ožžon doarvái bargiid festiválaguovllu ceggemii, muhto čorgemii ja johtolaga stivremii sii dárbbašit velá bargiid.

Lasi Beaivvi ságaid ja Yle Ođđasiid Sámis sáhtát guldalit Yle Areenas.

30.7. dmu 13.59: Bajilčállaga rievdaduvvon: ovddit bajilčála lei Guldal jiena: Ijahis Idja lea bivnnut korona maŋŋel – bileahtavuovdin lea vuolgán bures johtui.

Varrasamosat: Sápmi

Váldoođđasat

Varrasamosat

Muualla Yle.fi:ssä