Sápmi |

Guldal jiena: Ijahis idja ohcá eaktodáhtolaš bargiid

Eamiálbmotmusihka festivála Ijahis idja lágiduvvo 14. beaivve borgemánu.

Ijahis idja 2019
Dán jagi Ijahis Idja lágiduvvo 14. beaivve borgemánu. Govva: Vesa Toppari / Yle

Borgemánus olbmot besset fas návddašit sámemusihkas ja festiváladovddus, go dalle lágiduvvo Ijahis Idja -festivála Anáris.

Muhto ovtta ášši haga ii sáhtášii dánge festivála ordnet, namalassii eaktodáhtolaš bargiid haga.

Danin festiválas ohcetge dál eaktodáhtolaš bargiid buotlágán bargguide, muitala Ijahis idja -festivála veahkkebuvttadeaddji Aleksi Ahlakorpi.

Eaktodáhtolaččaid dárbbašit earret eará johtolaga stivremii, čorgemii, bileahtaid vuovdimii ja dán jagi maiddái festiválaguovllu huksemii. Eaktodáhtolaččat oažžut nuvttá festiválabileahta festiválii ja liegga borramuša.

– Áibba bures leat ožžon dieid eaktodáhtolaččaid, muhto eanetge sáhtášii leat. Dál sullii logemat olbmo leat ohcan, Ahlakorpi muitala.

Ahlakorpi mielde 20-30 eaktodáhtolačča livčče buorre oažžut festiválii vai olbmuide eai šatta menddo guhkes bargovuorut.

– Dán jagihan dat lea beare beaivve guhkkosaš festivála, muhto lihkká mii dárbbašit diesá eaktodáhtolaččaid.

Ahlakorpi muittuha, ahte eaktodáhtolaččat eai dárbbaš máhttit olu ovddalgihtii ja sin dieđusge rávvet.

– Bileahttavuovdimii isket oažžut olbmot, geat máhttet man nu sámegielain ja dasto suomagiela, kánske eaŋgalasgiela. Álo leat bidjan nie, ahte giige ii gártta leat okto.

Ahlakorpi lea fuomášan oahpes namaid ovddit jagiinge.

– Sullii bealis leat diekkár olbmot geat leat ovdalge leamašan. Jáhkkán sii leat liikon dien veardde dien hommái, ahte dasto leat ohcan ođđasit, son jáhkká.

Lassedieđuid sáhtát lohkat dáppe.

Guldal dás maid Aleksi Ahlakorpi muitala. Jietna: Sáárá Seipiharju / Yle

Beaivvi ságaid ja Yle Ođđasiid Sámis sáhtát maid guldalit Yle Areenas.

Varrasamosat: Sápmi

Váldoođđasat

Varrasamosat

Muualla Yle.fi:ssä