Sápmi |

Guldal jiena: Ingá-Máret Gaup-Juuso lea joavkkuinis bargamin ođđa skearru – "Dán háve áiggon čalmmustahttit nissonolbmuid eallima"

Skearru almmuhanáigetávvalis Ingá-Máret Gaup-Juuso ii máhte vel dárkilabbot dadjat.

Ijahis Idja 2018
Tundra Electro lea čuojahan Ijahis Idja -festiválas jagis 2018. Govva: Vesa Toppari / Yle

Sámi artista ja juoigi Ingá-Máret Gaup-Juuso lea joavkkuinis Tundra Electroin bargamin ođđa skearru. Gaup-Juuso muitala, ahte son lea válljen dál bargat nissonolbmuid luđiiguin.

– Mus lea leamaš ulbmilin čohkket sihke dološ ja ođđa luđiid, ja dán háve áiggon daid luđiiguin čalmmustahttit nissonolbmuid eallima.

Tundra Electro -joavkkus loaiddastit Gaup-Juuso lassin musihkkarat Patrick Shaw Iversen, Harpreet Bansal, Aleksander Kostopoulos ja Håkon Elias Pettersen.

Arkiivabáttiin unnán gullojit nissonolbmot juoigamin

Gaup-Juuso lea ožžon bargostipeandda Sámiráđis dán jahkái. Son lea dutkan arkiivvaid ja ohcan luđiid sihke dutkan girjjálašvuođa, mat gusket luđiide. Gaup-Juuso lea gávnnahan, ahte arkiivvain unnán gullojit báttit, main nissonolbmot juiget.

– Die leige okta sivva, manin dál hálidin dušše nissonolbmuid eallima loktet bajás. Ja dat mii mu mielas orru ártet lea, ahte munhan dieđán ahte leat hui juoigalas nissonolbmot maid ovdalnai leamaš, muitala Gaup-Juuso.

Son muitala, ahte lea maiddái sosiála mediaid bokte jearran olbmuin, maid luđiid sii hálidit gullat Tundra Electro boahttevaš skearrus.

– Mun in obanassiige vuordán, muhto hui olu olbmot leat váldán oktavuođa. Dat lei mu mielas hui somá oaidnit, ahte luđiiguin mii sáhttit nannet servodaga ja gulahallama. Dat gal liggii mu váimmu, dadjá Gaup-Juuso.

Skearru almmuhanáigetávvalis Gaup-Juuso ii duostta dárkilabbot dadjat vel eanet, muhto golmma jagi sisa skearru galggašii gárvvásmuvvat.

Guldal Ingá-Máret Gaup-Juuso jearahallama dás. Jietna: Susanna Guttorm / Yle

Varrasamosat: Sápmi

Váldoođđasat

Varrasamosat

Muualla Yle.fi:ssä