Sápmi

Guldal jiena: ISFI kursa filbmagiehtačálliide lea jođus – "Measta buot filbma ideain lei mielde sápmelaš mytologiija ja oaidnemeahttun máilbmi"

Liisa Holmberg
Liisa Holmberg jáhkká ahte dán giehtačálli kursa bohtosiid sáhttá oaidnit boahttevuođas ođđa mánáidfilmmain. Govva: Vesa Toppari / Yle

Filbmakonsuleanta Liisa Holmberg muitala, ahte máŋgasat ledje beroštuvvan kurssas

Internašunála Sámi Filbmainstituhtta lágida kurssa filbmagiehtačálliide, geain lea beroštupmi čállit filmmaid mánáide ja nuoraide.

Filbmakonsuleanta Liisa Holmberg muitala ahte kursa lea dál jođus. Máŋgasat ledje beroštuvvan kurssas ja oktiibuot sii ožžo logi ohcamuša.

Ovcci oahppi, geat loahpa loahpas álggahedje kursa, leat eret Norggas ja Ruoŧas. Holmberg muitala, ahte mielde leat davvisámegiela, muhto maiddái máttasámegiela hállit. Oahpaheaddjin kurssas leat Amanda Kernell, Kate Leys ja Holmberg ieš.

– Kurssa oahpahusgiella lea eaŋgalasgiella, mii lea dieđusge váivi, muhto mii háliideimmet buot buoremus oahpaheddjiid, son muitala.

Son jáhkká, ahte šaddet ođđa sámegielat mánáidfilmmat

Ohccit sáddejedje sin filbmaideaid, man vuođul sii dál čállet iežaset filmmaid. Holmberg muitala, ahte buot dát filbmaideat ledje hui buorit.

– Measta buot filbma ideain lei mielde sápmelaš mytologiija ja oaidnemeahttun máilbmi.

Holmberg jáhkká, ahte daid giehtačállosii vuođul šaddet ođđa sámegielat mánáidfilmmat.

– Mun jáhkán, ahte šaddet guhkesfilmma giehtačállosat, muhto maiddái oanehisfilmma. Dain buohkain leat buorit materiálat, main sáhtášii dahkat filmma.

Guldal maid Liisa Holmberg muitala ISFI virtuála filbmačállin kursa birra.

Varrasamosat

Muualla Yle.fi:ssä