Sápmi |

Guldal jiena: Jussi Isokoski ja Kati Eriksen ásaheigga ođđa sápmelaš buvttadanfitnodaga

Isokoski oaivvilda, ahte sámemusihkka gáibida ja ánssáša buvttadanfitnodaga, mii lea eiddo dan várás huksejuvvon.

Jussi Isokoski ja Kati Eriksen
Jussi Isokoski ja Kati Eriksen leaba ovttastahttán návccaideaskka ja bargagoahtiba dál ovttas sámemusihka ja -media ovdii. Govva: Jussi Isokoski

Jussi Isokoski ja Kati Eriksen leaba ásahan ođđa sámemusihka ja -media buvttadanfitnodaga, Uksi Production. Dán rádjai Suoma bealde almmustuvvan sámemusihkas eanaš lea buvttaduvvon Tuupa Records -mediafitnodaga olis, man Isokoski vuođđudii jagis 2004.

– Dát lea lunddolaš joatkka mu eallinbargui, oaivvilda Jussi Isokoski.

Dál ulbmilin lea sirdit Uksi Production vuollái buot Tuupa sámeartisttaid buvttadeami ja čatnat dasa maid ođđa artisttaid. Tuupa lea sturron eandalitge dáhpáhus- ja konseartateknihka oasil, eaige sámemusihka buvttadeapmái orron šat leamen doarvái návccat. Dan Isokoski hálidii nuppástuhttit.

– Sámemusihkkii laktásit nu ollu iešvuođat, mat eai gávdno váldoservodaga musihkas. Danin sámemusihkka gáibida ja ánssáša buvttadanfitnodaga, mii lea eiddo dan várás huksejuvvon, Isokoski muitala.

Guhkes suokkardallama maŋŋá ja máŋgga mohki bokte šattaiga soai Erikseniin de cegget ođđa buvttadanfitnodaga, muitala Isokoski.

Bargu lea oahpis, daningo Isokoski lea bargan sámekultuvrra ovdii jo guoktelot jagi. Dan ovddas sutnje mieđihuvvui Áillohaš-bálkkašupmi jagis 2015.

Jussi Isokoski gávnnahii, ahte Tuupa Recordsis ii lean doarvái áigi sámemusihkkii. Danin mearrideigga Kati Erikseniin vuođđudit ođđa buvttadanfitnodaga. Jearahallan lea suomagillii. Jietna: Jouni Aikio / Yle

Buvttadišgohtet sámemusihka lassin spealuid ja ealligovaid

Buvttadanfitnodat áigu viidut maid eará mediasuorgái, nu mo spealuide ja ealligovvii.

– Sámekultuvra geasuha. Mii sápmelaččat fertet ieža deavdit dien dárbbu, muđuid earát barget dan, Eriksen lohká.

Son lea jo 1990-logus bargan sámekultuvrra stereotyhpalaš boasttogeavaheami vuostá. Dan rájes Eriksen lea doaibman sámegiela ja kultuvrra ovddideaddjin sihke eaktodáhtolaš bargin servviin ja sierra bargoaddiid bálvalusas. Dál Eriksen jođiha golbma prošeavtta, main okta lea Sámi musihkkaakademiija.

Dál son bargagoahtá maid beaivválaš jođiheaddjin Uksi Production Ltd -fitnodagas, man ruoktobáiki lea Ohcejohka. Eriksen árvala, ahte goit álggus son sáhttá bargat fitnodagain astoáiggis.

– Dieđusge jos dát stuorru, de dađistaga várra munge dalle geahpedan daid dienasbargguid ja álggán bargat eanet fitnodagain, suokkardallá Eriksen.

Ođđa buvttadanfitnodaga beaivválaš jođiheaddji Kati Eriksen muitala sudno Jussi Isokoskiin gávnnahan, ahte sámemusihkka ja sámi ealligovva- ja speallomáilbmi dárbbašit iežas báikki, mas olles sisdoallu lea sámi buvttadandoaibma. Jietna: Jouni Aikio / Yle

Varrasamosat: Sápmi

Váldoođđasat

Varrasamosat

Muualla Yle.fi:ssä