Sápmi |

Guldal jiena: Juuso Valle lea ráhkkanan soahteveaga álgimii árat lihkkamiin ja lášmmohallamiin

Otne mánnodaga ođđa soalddátálggut álggahit soahteveagas.

Juuso Valle, Karigasniemi
Juuso Valle álggaha soahteveagas Soađegili jeagárprikáhtas mánnodaga 5.7. Govva: Sara Wesslin / Yle

Sulaid 12 000 ođđa soalddátálggu álggahit soahteveagas otne mánnodaga 5.7. Gáregasnjárgalaš Juuso Valle lea okta sis. Son lea vuolgimen Soađegili jeagárprikáhtii, ja muitala dan leat veháš gelddolaš.

– Dat lea áibbas ođđa biras ja ii leat ovddit vásáhus, nu leahan dat gelddolaš.

Valle bálggis Soađegillái lea johtán máŋgga mohki bokte. Álggos lei áigumen Avvilii, muhto doppe ii lean suorgi masa livččii háliidan. Dasto mearridiiges vuolgit Kajaanii.

– In beassan dohko Kajaani, de miison majuvra dat lei gii riŋgii munnje ja dajai, ahte Soađegilis livččii báiki jos háliidan molsut. Munhan dasto dadjen, ahte dat gal lea áibbas buorre, mun manan dohko Soađegillái.

Valle lea álo liikon beatnagiidda, ja livččiige háliidan soahtebeatnagiid bagadallin. Nubbi suorgi masa háliidii lei soahteboles, ja dál sávváge beassat soahtebolesin Soađegillái.

– Vuorddán dan, ahte mus nohká dat 12 vahku ja dat oahpásmuvvanáigodat, ahte beasango dan suorgái masa háliidan. Dathan ii leat vel sihkkar, de oaidnit leš.

Juuso Valle lea ráhkkanan soahtevehkii vuolgimii, ja leage lihkkan juohke iđida guđa áigge ja fitnan veháš viehkame dahje juoidá eará lášmmohallamen. Ára iđidiidda son leage jo oalle bures hárjánan.

– Vuosttaš iđit lei viehka duski, muhto dan maŋŋá dat lea leamašan, in sáhte dadjat ahte somá, muhto diekkár ahte gal dainna birge, bohkosa Valle.

Juuso Valle álggaha soahteveagas mánnodaga 5.7. Guldal dás makkár jurdagat sus leat soahtebálvalusa álggaheamis. Jietna: Sáárá Seipiharju / Yle

Varrasamosat: Sápmi

Váldoođđasat

Varrasamosat

Muualla Yle.fi:ssä