Sápmi |

Guldal jiena: Keiino lágida eahkes vuosttas skearrus almmustahttinkonseartta neahtas – OKTA sisdoallá luođi ovttas popmusihkain

Fred René Buljo illuda, go viimmat besset almmuhit skearru, man namma lea OKTA.

Keiino, Tom Hugo, Alexandra Rotan ja Fred René Buljo
Keiino oassálastii diibmá Eurovision -lávlungilvui. Jovkui gullet Tom Hugo, Alexandra Rotan ja Fred René Buljo. Govva: Keiino

Odne almmustuvvá Keiino-joavkku vuosttaš dievas albuma. Joavku lea almmustahttán juo máŋggaid singeliid dan maŋŋá, go diibmá lei mielde Eurovision-lávlungilvvus.

Keiinoi gullet juoigi Fred René Buljo ja lávlut Alexandra Rotan ja Tom Hugo.

Ođđa skearru namma lea OKTA ja dainna sii háliidit buktit ovdan, ahte luohti ja pop-musihkka gullojit oktii ja ahte eamiálbmotmusihkain lea vejolaš fáhtet stuorra publikumma miehtá máilmmi.

Fred René Buljo lea vuosttaš háve almmolaččat juoigágoahtán namalassii Keiino-joavkku bihtáin.

– Lea leamaš hui somá, go lean beassan almmolaččat juoigat. Dovddan, dego livččen áibbas ođđa olmmoš, muitala ráppejeaddjin Duolva Duottar -joavkkus oahpisin šaddan Buljo.

Vaikko Buljo olu juoigáge Keiino bihtáin, de skearrus gullo su jietna eará vugiin maiddái.

– Mun sihke lávllun, ráppen ja juoiggán dán skearrus. Lea somá beassat čájehit dáid siidduid mus, lohká Buljo.

Almmustahttinkonsearta dollojuvvo odne 19.00 áigge eahkes (Norgga áigi) neahtas. Dáppe gávnnat lassedieđuid.

Varrasamosat: Sápmi

Váldoođđasat

Varrasamosat

Muualla Yle.fi:ssä