Sápmi |

Guldal jiena: Kirste Paltto ja Laila Labba nuoraidromána evttohassan Davviriikkalaš Ráđi girjebálkkašupmái

Girji Jođašeaddji násti lea evttohassan mánáid ja nuoraid girjjálašvuođa bálkkašumi oažžun.

Girječálli ja govvadáiddár.
Girječálli Kirste Paltto lea čállán Jođašeaddji nástti máidnasa ja govvadáiddár Laila Labba lea sárgon dasa govaid. Govva: Kimmo Pallari ja June Bjørnback

Girječálli Kirste Paltto ja govvadáiddár Laila Labba girji Jođašeaddji násti lea evttohassan oažžut dán jagi Davviriikkalaš Ráđi mánáid ja nuoraid girjjálašvuođabálkkašumi.

Kirste Paltto lea čál­lán girjji máidnasa ja Laila Labba lea sárgon dasa govaid.

Girji muitala guovtte nuora fearánis, go soai gávdnaba eatnamii gahččan nu gohčoduvvon ufo, man fárus lei gánda, guhte hástalii sudno vuolgit váhá jođašit vaikko vus mánnui. Ja nu dán jođašeaddji nástti fárus gánddat beassaba guhkás gomuvuhtii, gos ássaba njeal­je­oaiv­vat stállu ja mánno­lak­kis.

Paltto mielas lea dieđus somá, go girji lea nammaduvvon evttohassan bálkkašupmái. Evttohasvuohta mearkkaša maiddái dan, ahte girji jorgaluvvo sámegielas muhtun davviriikkalaš gillii. Paltto árvala, ahte dán vuoro dat jorgaluvvo dárogillii, go Davvi Girji Kárášjogas lea dan goasttidan.

Makkár lea Jođašeaddji násti? Dan birra muitala dá girječálli Kirste Paltto ieš. Son guorahallá maiddái maid dat mearkkaša, go lea evttohassan Davviriikkalaš Ráđi girjebálkkašumi oažžun. Jietna: Jouni Aikio / Yle

Dovddus girječálli ja nuorra dáiddár

Kirste Paltto lea čállán valjis iešguđetlágan girjjiid, ja oasit su girj­jiin leat jorga­luv­von eará gie­laide. Paltto lea ožžon bálk­ka­šu­miid ja leamaš evt­to­huv­von bálk­ka­šu­miide.

Son oaččui Suoma Sámedikki girj­já­laš­vuođa bálk­ka­šumi 1995:s ja riik­kaid­gas­ka­saš Helen-bálk­ka­šumi seamma jagi. Su girjjit leamašan maid ovdal evttohassan oažžut Davviriikkaid Ráđi girjebálkkašumi.

Laila Labba lea 25-jah­ká­saš ja bargá aspirántan Sámi dáid­da­guovd­dá­žis Kárášjogas. Son lea vázzán Kárášjoga dáiddaskuvlla ja gazzan dáiddaoahpu Huddersfield universitehtas Englánddas. Jođašeaddji násti lea vuost­tas girji, masa son lea ráhkadan govaid. Dan lassin son lea sárgon govaid oahppogirjjiide ja háb­men gir­je­olg­goža Sáve Sápmi -gir­jái.

Dá gulat ođđasamos Yle Ođđasiid Sámis. Jietna: Yle

Yle Ođđasiid Sámis ja Beaivvi ságaid sáhtát guldalit Yle Areenas.

Varrasamosat: Sápmi

Váldoođđasat

Varrasamosat

Muualla Yle.fi:ssä