Sápmi |

Guldal jiena: Koronaboahkuheamit joatkašuvvet sámigielddain – Ohcejogas leat boahkuhan 249 olbmo guovvamánu loahpa rádjai

Ohcejogas boahkuhit dán vahku rájes 70–79-jahkásaččaid ja riskajovkui gullevaš olbmuid, muitala dikšobarggu jođiheaddji Päivi Kontio.

Päivi Kontio, Utsjoki
Ohcejoga gieldda dikšobarggu jođiheaddji Päivi Kontio muitala, ahte stuorra oassi gieldda badjel 80-jahkásaččain leat boahkuhuvvon. Govva: Anneli Lappalainen / Yle

Koronaboahkuheamit joatkašuvvet dál buot sámigielddain. Gielddat leat ožžon fas lasi boahkuhanávdnasiid.

Anáris boahkuhit dál badjel 78-jahkásaččaid sihke riskajoavkkuide gullevaš olbmuid. Ohcejogas boahkuhit dán vahku rájes 70–79-jahkásaččaid ja riskajovkui gullevaš olbmuid.

Stuorra oassi sis leat dakkárat, geaid boahkuhanáiggiid leat gártan šluhttet golbma vahku dassá go eai lean ožžon lasi boahkuid, muitala dikšobarggu jođiheaddji Päivi Kontio.

– Juohke vahkus várra beassat boahkuhit muhtin veare, muhto dat ovdána njozet go mii oažžut boahkuid ovtta bohtala hávális. Ovtta bohtalis reahkká sullii 10 olbmui boahkuhanávnnas, lasihastá Kontio.

Ohcejogas leat guovvamánu loahpa rádjai boahkuhan 249 olbmo. Stuorra oassi badjel 80-jahkásaččain leat ožžon boahkuhusa.

Eanodagas ja Soađegilis leat joatkán boahkuhemiid guovvamánu loahpabealde. Eanodagas boahkuhit dál vuollel 70-jahkásaččaid, geat gullet riskajovkui. Soađegilis fas jotket badjel 80-jahkásaččaid ja riskajovkui gullevaš olbmuid boahkuheami.

Guldal dás Päivi Kontio jearahallama suomagillii. Jietna: Susanna Guttorm / Yle

Beaivvi ságaid ja Yle Ođđasiid Sámis sáhtát maid guldalit Yle Areenas.

Varrasamosat: Sápmi

Váldoođđasat

Varrasamosat

Muualla Yle.fi:ssä