Jurista Oula-Antti Labba oaidná buorrin Ovttastuvvan našuvnnaid olmmošvuoigatvuođakomitea ávžžuhusaid Supmii.
ON olmmošvuoigatvuođakomitea almmuhii gieskat ávžžuhusaid, maid mielde Suopma ferte earet eará ovddidit sámediggelága ođasmahttima ja smiehttagoahtit fas ILO 169 -soahpamuša ratifiserema. Dasa lassin komitea ávžžuha skuvlet iešguđet eiseválddiid sápmelaččaid rivttiin eamiálbmogin.
Labba mielas lea hui positiiva, ahte ON olmmošvuoigatvuođakomitea heiveha jagis 2007 dohkkehuvvon eamiálbmotjulggaštusa maiddái siviila- ja politihkalašrivttiid soahpamuša tulkomis ja eará áššiin, mat gusket olmmošvuoigatvuođaid.
Son maiddái muittuha, ahte Suomas lea geatnegasvuohta čuovvut dáid ávžžuhusaid, dasgo Suopma lea ratisiferen siviila- ja politihkalašrivttiid soahpamuša.
– Dál go komitea lea addán daid ávžžuhusaid, de stáhta galgá jeagadit ja rievdadit riikka siskkáldas láhkaásaheami vástidit dan linnjá, man dat komitea lea hábmen, deattuha Labba.
