Sápmi |

Guldal jiena: Lappi guovlohálddahusdoaimmahat fállá sámegiela giellagáhttema oahpaheaddjiide ja árrabajásgeassiide

Oahpahusdoaimma bajit dárkkisteaddji movttiidahttá davvisámegiela gáhttemii.

Kari Torikka
Lappi guovlohálddahusvirgedoaimmahaga oahpahusdoaimma bajit dárkkisteaddji Kari Torikka oaidná, ahte eandalii oahpahusgiela lea dehálaš gáhttet. Govva: Kirsti Länsman / Yle

Lappi guovlohálddahusvirgedoaimmahat AVI ordne ovttasbarggus Oulu universitehta Giellagas-instituhtain davvisámegielat giellagáhttenskuvlejumi duorastaga.

Oahpahusdoaimma bajit dárkkisteaddji Kari Torikka muitala, ahte sámegiella lea ovdánan ja nuppástuvvan. Dan dihte lea dehálaš gáhttet eandalii oahpahusgiela, go giella sirdása čuovvovaš buolvvaide.

– Dat lea oaivvilduvvon erenoamážit sámegiela ja sámegielat oahpaheaddjiide, muhto maiddái árrabajásgeassiide. Ii mihkkige gieldde maiddái olbmuid oassálastimis skuvlejupmái, geain lea beroštupmi sámegiela geavaheapmái, muitala Torikka.

Ain geargá almmuhit iežas davvisámegiela giellagáhttemii

Skuvlejupmi ordnejuvvo neahta bokte golmma maŋŋálas duorastaga, veaigebeaivvi áigge. Das lea sisdoallun váldogielaid váikkuhusat, sámegiela erenoamášvuohta ja maiddái sátneráhkadeapmi. Dat bistá oktiibuot guhtta diimmu ja guokte diimmu ain hávil, muitala Torikka.

Davvisámegiela giellagáhttenskuvlejupmi álgá dán vahku duorastaga 14.1. Skuvlejumis leat golbma oasi. Almmuheapmi davvisámegielat giellagáhttenskuvlejupmái nohká gaskavahku 13.1. diibmu 16.00. Lassedieđuid gávnnat dáppe.

Plánan ordnet sullasaš skuvlejumi maiddái anárašgillii

Kari Torikka muitala, ahte Lappi guovlohálddahusvirgedoaimmahagas leat plánat ovdánahttit sámegiela giellagáhttema ja giela riggudahttima skuvlejumiid.

– Ii dušše davvisámegillii, muhto maiddái anárašgielat giellageavaheaddjiide lea dárkkuhus lágidit maŋimuštá boahtte čavčča áigge, čilge Torikka.

Lappi guovlohálddahusvirgedoaimmahaga oahpahusdoaimma bajit dárkkisteaddji Kari Torikka muitala skuvlejumis eambbo. Jietna: Laura Pieski / Yle

Varrasamosat: Sápmi

Váldoođđasat

Varrasamosat

Muualla Yle.fi:ssä