Sápmi |

Guldal jiena: Logit olbmot karantenas Anára ja Ohcejoga koronanjoammumiid geažil

Ohcejoga gieldda jođiheaddji doavttir Heidi Eriksen sávvá olbmuid ohcalit koronateasttaide, go leat vehášge dávdamearkkat.

Heidi Eriksen
Ohcejoga gieldda jođiheaddji doavttir Heidi Eriksen ávžžuha olbmuid čuovvut korona dihte addojuvvon rávvagiid ja ávžžuhusaid. Govva: Vesa Toppari / Yle

Ohcejoga gielddas gávnnahuvvui duorastaga 26.11. positiiva koronavirusčájánas jođánis koronateasttain. Ohcejoga gieldda jođiheaddji doavttir Heidi Eriksen muitalii duorastaga, ahte buohccán olmmoš lea errejuvvon ja logemat olbmo leat karantenas.

– Orru gal, ahte mii leat dán muttus ožžon dan viehka bures háldui.

Eriksen muitalii duorastaga, ahte čájánasa bohtosa sihkkarastet vel PCR-teasttain, man bohtosat eai lean vel ievttá eahketbeaivái joavdán.

– Dávdamearkkat goit heivejit dasa olbmos, ja seamma njoammumii laktása maiddái dat Anára gieldda njoammun. Mii leat kárten viehka bures daid, geat leat gártán njoammunáitaga vuollái, ja dahkan karantenamearrádusaid.

Anára gieldda njoammundáhpáhusa geažil leat logit olbmot mearriduvvon karantenii, muitala Anára gieldda jođiheaddji doavttir Outi Liisanantti. Dađi dárkilut loguid son ii muital.

Doaktárat sávvet olbmuid čuovvut koronaávžžuhusaid

Outi Liisanantti deattuha, ahte vaikko karantenii leat Anára gielddas biddjon maiddái mánát, lea dávdda leavvan mánáid bokte hui hárvenaš. Liisanantti muittuha, ahte ahki lea okta stuorra riskadahkki, nappo dávdda riskajovkui gullet badjel 70-jahkásaččat.

– Sávašin eandalii, ahte min gieldda boarrásiid suodjalit ja galledemiid garvit. Ja ahte muitit daid karantenaáiggiid. Jos mátkkoštit, nu viggat čuovvut karantenaáiggiid ovdal go deaivat daid riskajoavkkuide gullevaš olbmuid.

Outi Liisanantti
Anára gieldda jođiheaddji doavttir Outi Liisanantti muittuha, ahte koronavirusa leavvan mánáid bokte lea hárvenaš. Govva: Vesa Toppari / Yle

Heidi Eriksen oaivvilda dán leat buorre muittuhus buohkaide, ahte korona olaha maiddái davimus Sápmáige, ja njuolggadusaid fertešii čuovvut olles áigge.

– Muitit čuovvut dan máskaávžžuhusa, dorvogaskkaid ja gieđaid muitit bassat. Ja smiehttat dárkilit mátkkošteami dakkár báikkiide, gos korona lea jo jođánis leavvama muttus.

Eriksen maiddái sávvá, ahte olbmot ohcalit teasttaide jos vehášge leat dávdamearkkat.

– Eandalii dál, go mis lea dát johtilis teasta geavahusas, mii fidnet bohtosa jođánit ja álkit. Áibbas jo seammás go leat veháge matge dávdamearkkat, de boahtit testet. Dat lea dat áidna vejolašvuohta, mainna mii bissot fárus daid koronanjoammumiid ektui.

Heidi Eriksen muitala, ahte sis galgá odne bearjadaga 27.11. koronajoavku čoahkkin, gos sii smihttet leago dárbu muhtin doaimmaid gáržžidit, dahje bargat áššiin viidásabbot.

Ohcejoga gieldda jođiheaddji doavttir Heidi Eriksen muitalii duoarstaga 26.11. Ohcejogas gávdnon koronanjoammumis. Jietna: Laura Pieski / Yle

Varrasamosat: Sápmi

Váldoođđasat

Varrasamosat

Muualla Yle.fi:ssä