Sápmi |

Guldal jiena: Máddin bálget goardi báhkain – Yle meteorologa: Sámis ii dárbbaš bálgat báhkain

Goardi báhkaid áigge olmmoš ii veaje guovlalitge olggos iige bálle oađđitge. Nubbi čohkká bálkoŋŋas, nubbi vujii Sápmái čoaskasii.

Osmo Pieski
Osmo Pieski návddaša justa dál Sámi geassedálkkis. 15 liekkasgráđa lea su mielas áiddo muttát. Govva: Privahtagovva

Otne sihkkarit máddin olbmuin golgá bivastat ja olbmot gártet bálgat báhkaiguin. Otne ja ihttin sáhttet mihtidit Mátta- ja Gaska-Suomas juobe olahusbáhkaid, muitala Yle meteorologa Matti Huutonen.

– Gaskabeaivvi sulaid Vaasas mihtidedje jo 31,1 gráđa. Diekkár loguid eai juohke gease mihtit gostige Suomas ja dál eallit easkka geassemánu, ahte gal dat earenomáš báhkas lea dál, nanne Huutonen.

Báhtarii báhkaid davás

Osmo Pieski lea Orimattila gávpoga hoavda, muhto dál ii bálgga báhkain, baicce lea vuodján Sápmái.

– Dáppe lea dál 15 gráđa liekkas. Dat lea áiddo buorre, ii leat nu báhkka. Jus lea 30 gráđa, de dat lea jo nu báhkas. Jus ii livčče dakkár mášen, mii čoaskuda doppe siste, de dalle ii sáhte oba oađđitge.

Báhkaide maid hárjáná, jeđđe Pieski.

– Mannan geasi ledje guhkes báhkat. Go de niejai dat liekkasvuohta vuollái 25 gráđa, de orui, ahte lea beanta jo galmmas.

Beaivvi báhkasamos muttus ii veaje olggos

Mervi Sistonen orru geardeviesus Helssegis. Beaivvi báhkasamos muttus son ii veaje finadit olgun, easkka eahketbeaivve guovlala olggos.

Mervi Sistonen
Vaikko báhkaide hárjánage, de Sistonen váillaha Sámi álgogeasi. Govva: Privahtagovva.

– Lean duđavaš go dán viesus lea balkoŋŋa nuorttas, iđitbeaivváš ii báitte dohko. Doppe sáhttá eahketbeaivve ja eahkedis čohkkát, muitala Sistonen.

Sistonen lea eret Gápmasis, Anáris. Vaikko leage muhtin muddui jo hárjánan báhkaide, de váillaha Sámi čoaska gesiid, muhto ii čuoikkaid.

– Mun liikošin leat doppe geassemánus ovdal go čuoika girdila.

Goardi báhkat eai ole dán vuoru Sápmái – lávvardaga čoasku

Muhtumiidda váivi, nuppiide lihku, oainnát dát báhkat ollet áiddol de Mátta- ja Oarje-Lappii, muhto eai Sápmái, muitala Yle meteorologa Matti Huutonen.

– Sámis lieggaseamos boddu lea namalassii duorastaga. Boahtte ija davádat buktá fárustis Jiekŋameara guovllus čoaskkadaga. Sámis lávvardaga sáhttet liekkasgráđat báhcit logi gráđa sulaide.

Varrasamosat: Sápmi

Váldoođđasat

Varrasamosat

Muualla Yle.fi:ssä