Sápmi |

Guldal jiena: Masa don geavahivččet gielddaid ruđaid?

Anára gielda geahččala nuppi geardde hábmet bušeahta nu, ahte gieldalaččat sáhttet evttohit oasi ruhtageavaheamis. Eanodaga gielda attii juo diibmá olles bušehttii sáni saji.

Verena Kortelainen
Anára buresveadjinkoordináhtor Verena Kortelainen hástala olbmuid oassálastit. Govva: Jouni Aikio / Yle

Anár gielda lea dál nuppi jagi mieldálagaid várren 10 000 euro, man geavaheami gieldalaččat ožžot evttohit.

Evttohusat galget leat dakkárat, maid sáhttá lágaid mielde ollašuhttit, dat galget gullat gieldda doaibmaváldái, dáhpáhuvvat Anára gielddas ja ožžot máksit eanemustá 10 000 euro.

Evttohit sáhttá gitta 19.5.2020 rádjái Anára gieldda neahttasiidduid bokte. Koronadili dihte evttohusaid čogget dušše beare elektronalaš hámis.

– Dán rádjái leat boahtán juo 40 evttohusa, dadjá buresveadjinkoordináhtor Verena Kortelainen.

Evttohusaid čoaggima maŋŋá gielddas guorahallet evttohusaid ollašuhttinvejolašvuođaid ja rehkenastet fidnuide bušeahta. Dan maŋŋá evttohusain čohkkejuvvojit heivvolamosat, maid gaskkas gieldalaččat sáhttet jienastit buoremusa ollašuhttimii.

Mannán jagi evttohusain mearridedje divodit ja buoridit Avvila beanapárkka.

Guldal Verena Kortelainen jearahallama. Jietna: Jouni Aikio

Eanodagas álbmot beasai evttohit olles bušeahtas

Eanodaga gielda attii juo jagis 2019 gieldalaččaide sáni saji gieldda ruđaid geavaheamis. Eanodagas gieldalaččat sáhttet váikkuhit olles 15 miljovnna euro bušeahta sisdollui.

Dábálaččat gieldalaččaide addet sáni saji dušše olu uhcit oassái bušeahtas, čállá Kuntalehti.

– Mis leat buorit vásáhusat ja olbmot ledje hui aktiivvalaččat sáddet e-poasttaid ja evttohit ruđaide buriid geavahanvejolašvuođaid, muitala Eanodaga gielddahoavda Jari Rantapelkonen.

Guldal Jari Rantapelkonen jearahallama. Jietna: Jouni Aikio

Varrasamosat: Sápmi

Váldoođđasat

Varrasamosat

Muualla Yle.fi:ssä