Mohtorgielkámáđiijaid dahje johtolagaid ii leat dán dálvve vel beassan merket, muitala Aimo Leppäkangas Meahciráđđehusa luondobálvalusain. Bivvalat leat dagahan dan, ahte stuorát jávrrit jikŋo maŋŋit iige jiekŋa Anárjávrri čilggiin leat vel doarvái nanus.
Ii leamaš muđuige hoahppu merkemiin, go korona dihte eai leat safarimátkkálaččat dárbbašeamen máđiijaid.
– Johtolagaid sáhttá merkegoahtit čázádagaide easkka dalle, go rašimus báikkiinge leat jieŋat nanosmuvvan doarvái, muitala Leppäkangas.
Almmolaš mohtorgielkájohtolagaid álget merket áramustá boahtte vahku álggus, 18.1.2021. Leppäkangas muitala, ahte merkemiin sii eai hálit oba giktalitge olbmuid vel mannat rašis jieŋaid ala.
Jávrrit eai leat galbmon ja dat dovdo garrasit ámmátguolásteaddji dietnasis
Dálveáiggi guollebivdduin Anáris ii dinen gal vel juovlamánus. Ámmátguolásteaddji Veikko Kiviniemi muitala, ahte liehmus čakčadálvvi geažil jávrrit eai leat galbmon albmaláhkai ja buoremus bivdoáigi manai.
Jieŋat leamaš ain rašit iige ovdamearkan Anárjávrri ala leat beassan nu mo dábálaččat. Meahccejávrriin gal lea viehka nana jiekŋa, muhto jorkŋaid ravddain dušše logemat sentte.
– Mun in leat beassan Avviljotnjálmmis johtit njuolga jávrri ala, baicce lean vuodján vuos geainnuid mielde Njellim bokte Anárjávrri nuorttabeallái ja doppil iežan bivdobáikkiide, muitala Kiviniemi.
Kiviniemi bivdá dál ovddemuštá čuovžžaid ja njágáid Anárjávrri Vasikkaselkäs (Kálbáiääpi). Njágáid son jođiha bures Gaska- ja Mátta-Supmii.
