Sápmi |

Guldal jiena: Miellačájeheaddjit gáibidit buorádusaid ruvkeláhkii – Janne Hirvasvuopio muitala manin

Miellačájeheaddjit čoahkkanit riikkabeaidálu olggobeallái gaskabeaiáigge. Sii áigot loktet ovdan dan, mo ruvkelága galggašii buoridit.

Janne Hirvasvuopio
Janne Hirvasvuopio lea mielde miellačájáhusas, mas lea sáhka ruvkelága ođasmahttimis. Govva: Marja Väänänen / Yle

Janne Hirvasvuopio muitala Kaivostoiminnalle rajat -miellačájáhusa birra. Jietna: Anja Kaarret / Yle

Otne duorastaga ruvkedoaimmaide gáibidit rájáid Kaivostoiminnalle rajat -miellačájáhusas Helssegis. Miellačájáhus guoská ođđa ruvkeláhkii, man ráđđehus lea válmmaštallamin.

Okta miellačájeheaddjiin lea servodatberošteaddji Janne Hirvasvuopio. Son ovddasta doppe Ii ruvkkiid Suoma Giehtaruohttasii -lihkadusa. Hirvasvuopio jáhkká miellačájeheamis leat ávkki.

– Mun oainnán, ahte miellačájeheami ja joavkofámu bokte mearrideaddjit áddejit, man dehálaš dát ášši lea nu suopmelaččaide go sápmelaččaidege.

Mielde leat Ii ruvkkiid Suoma Giehtaruohttasii -lihkadusa lassin maiddái eará joavkkut, mat vuostálastet ruvkkiid: Saimaa ilman kaivoksia ry, Pro Heinävesi, Pelastetaan Päijänne ja Kansalaisten Kaivosvaltuuskunta – Mining Watch Finland. Dát joavkkut barget dán áigge ovttasbarggu eanet ja eanet.

Miellačájeheaddjiid mielas ráđđehus ii leat lihkostuvvan buoridit ruvkelága, nu mo ráđđehusprográmmii lea čállon. Sii gáibidit nana ruvkelága, mii ii vuovdde Suoma ođasmuvakeahtes luondduriggodagaid olgoriikkalaš ruvkefitnodagaide, baicce dain galgá fidnet dohkálaš buhtadusa. Sii maiddái gáibidit, ahte suodjalanguovllut, čázádagat ja sámeguovlu sestojuvvojit ruvkedoaimmain.

– Birassuodjaleami galgá albmaláhkai buoridit ja báikki olbmuid váikkuhanvejolašvuođaid ja gullama galgá buoridit. Dát leat guokte dehálamos ášši, maid mii geahččalit ollašuhttit, muitala Hirvasvuopio.

Miellačájeheaddjit čoahkkanit riikkabeaidálu olggobeallái gaskabeaiáigge.

Divvojuvvon 11.11. dii. 13.02 ođasmuvvi luondduriggodagat ođasmuvakeahtes luondduriggodahkan.

Yle Ođđasiid Sámis ja Beaivvi ságaid sáhtát maid guldalit Yle Areenas.

Varrasamosat: Sápmi

Váldoođđasat

Varrasamosat

Muualla Yle.fi:ssä