Sápmi

Guldal jiena: Niillas Holmbergii diktabálkkašupmi – "Dáidá leat mu vuosttas riikkadási girjjálašvuođabálkkašupmi"

Diktačállima lassin Holmberg lea bargamin musihkkaskearru ođđa joavkkuin. Vahku geažes almmustuvvetge ođđa musihkkabihttá ja -video.

Niillas Holmberg
Niillas Holmberg lea dovddus máŋggabealat dáiddárin. Govva: Kirsti Länsman / Yle

Ohcejohkalaš multidáiddár Niillas Holmberg lea ožžon Kirsi Kunnas -diktabálkkašumi. Bálkkašupmi juhkkojuvvui dál goalmmát geardde. Dán jagi dan oaččuiga guokte diktačálli, Niillas Holmberg ja Heli Laaksonen.

Duopmárjoavku atná árvvus dan, mo Holmberg ja Laaksonen atniba ávkin iežaska kulturidentitehta divttaid čáledettiin.

Niillas Holmberg lea čállán guhtta diktagirjji davvisámegillii ja guokte dain leat jorgaluvvon suomagillii. Maŋimuš dain, Juolgevuođđu, lihkostuvvá duopmárjoavkku mielas diagnoseret ođđaáigge máilmmi vajáldumiid ja vearrivuođaid sihke fállat doaivaga buoret boahtteáiggis.

– Munhan almmuhin suomagillii dan iežan Juolgevuođđu-diktačoakkáldaga mannan čavčča, Jalkapohja. Dál de faskejin diekkár bálkkašumi, ahte hui somáhan dat lea. Dáidá leat mu vuosttas riikkadási girjjálašvuođabálkkašupmi, dadjá Holmberg.

Juolgevuođđu-diktačoakkáldat lea dán jagi Davviriikkaid ráđi girjjálašvuođabálkkašumi evttohassan. Jagis 2013 almmustuvvan diktačoakkáldat Amas amas amasmuvvat lei maid evttohassan seamma bálkkašumi oažžun. Holmberg vuosttas diktačoakkáldat, Dego livččen oaidnán iežan, almmustuvai jagis 2009.

Ođđa musihkkabihttá ja -video almmustuvvet vahku geažes

Niillas Holmberg lea dovddus máŋggabealat dáiddárin. Son lea diktačállima lassin bargan musihkain, neaktán ja leamaš maid aktiivvalaš sámeáššiid bealušteamen.

Dál sus lea barggu vuolde dál ođđa musihkkaskearru ođđa joavkkuin ja dan olis almmustuvvetge vahku geažes ođđa musihkkabihttá ja -video.

Bearjadaga 22.5. almmustuvvá musihkkabihttá goittot Spotifyi ja iTunesii guldalanláhkai ja musihkkavideo fas sáhttá fitnat geahččamin Facebookas. Video lea bagadallan Katja Gauriloff.

Guldal dás Niillas Holmberg jearahallama. Jietna: Tuomo Laiti / Yle

Varrasamosat: Sápmi

Váldoođđasat

Varrasamosat

Muualla Yle.fi:ssä