Sápmi |

Guldal jiena: Nils-Matti Vasara oinnii njála ealo siste – dál skuvlejedje eaktodáhtolaččaid ohcat njálabesiid

Dutki sávvá, ahte njálla bessešii fas Suoma bealde. Dan dihte Meahciráđđehus ja WWF leat skuvlen eaktodáhtolaččaid Gilbbesjávrris ohcat ja dovdat njálabesiid.

Naali riistakameran kuvassa
Njálla biebmanautomáhta luhte. Govva: Metsähallitus

Dás lea gollan jo 25 jagi, go leat maŋimuš sihkkarastán njála bessema Suoma bealde.

Dál dutkiid mielas njálla sáhttá fas besset Suoma bealde, go njála leat áican olu eambo go maŋimuš jagiin. Meahciráđđehus lea maiddái dolvon njálaid biebmanautomáhtaid Ohcejoga ja Eanodaga duottarguovlluide moadde dálvve.

Nils-Matti "Niti" Vasara johtá olu boazobargguin duoddaris. Doppe son oinniige mannán dálvve ovtta njála. Dan ovdal ii leat moattelot jahkái oba vuohttánge njála.

– Oidnen njála dán dálvve ealloravddan, go eallu leamaš duos lahka gokko njálas lea beassi duoddara nalde. Eanet in leat gal oaidnán, inge leat vuohttán luottaid. Dat lea dat akta njálla, man lean oaidnán, muitala Vasara.

Dutkit sávvetge dál buori sáhpán- ja goddensáhpánjagi vai njálat lassánivčče.

– Lean hui optimisttalaš dan ektui. In dál veađu časkke, muhto sihkkarit ain jo lagaš jagiin boahtá dáhpáhuvvat, árvala Meahciráđđehusa bajitdárkkisteaddji Tuomo Ollila.

Tuomo Ollila
Tuomo Ollila jáhkká, ahte lagaš jagiin soaitá vuohttit njála dávjjibut duoddariin jođedettiin. Govva: Marianne Ketola / Yle

Vasara mielas lea njálaid suodjaleapmi lea buorre, muhto ii leat vuos oaidnán das konkrehtalaš ávkki. Son ballá, ahte biebmanautomáhtaid geažil riebanat lassánit ja nu maiddái riebanbivdit, geat vuojašit miehtá duoddariid ja háddjejit ealu.

– Dáppe ii goit juste dál leamaš ávki dainna, eai leat dihton nu ahte livčče ovddidan dan njála lassáneami dáppe Giehtaruohttasis.

– Dasa galggašii gávdnot juoga iežá geainnu mo dan suodjalit ja oažžut fas lassánit, oaivvilda Vasara.

Su mielas dutkit galggašedjege eambo ovttasbargat báikkálaš badjeolbmuiguin dainna áššiin, dasgo sis lea buoremus dovdamuš guovllu duovdagiin.

Guldal Nils-Matti Vasara jearahallama dás. Jietna: Jouni Aikio / Yle

Eaktodáhtolaččat veahkkin njálabesiid ohcamis

Meahciráđđehus ja luonddusuodjalanorganisašuvdna WWF ordnii Gilbbesjávrris kurssa, man olis leat skuvlen moaddelogi eaktodáhtolačča ohcat boares besiid, amas vejolaš bessen báhcit fuomáškeahttá. Áicamiid mielde njálla láve besset boares besiide dahje daid lahkosiidda.

Tuomo Ollila vetää naalipesien inventointikurssia Kilpisjärvellä heinäkuussa 2021
Kurssa vuosttas beaivve eaktodáhtolaččat manne čađa teoriija ja nuppi beaivve besse duoddarii ohcat njála besiid. Govva: Petteri Tolvanen / WWF

Daid eaktodáhtolaččaid bargun lea dárkkistit buot badjel 300 beasi Giehtaruohttasa duoddariin.

– Lea dehálaš máhttit oaidnit, ahte leago beassi anus ja leage doppe leamašan rieban vai njálla. Dat sáhttá leat oalle váttis, muhto dan bastá čielggadit. Sii maiddái fitnet dárkkisteamen besiid ortnega, čilge Ollila.

Varrasamosat: Sápmi

Váldoođđasat

Varrasamosat

Muualla Yle.fi:ssä