Sápmi |

Guldal jiena: Nuoraidráđđi plánemin bálkkáhit sámegielat nuoraidbargi

Nuoraidráđđi lea gárven doaibmaplána čuovvovaš njealji jahkái.

Anni-Sofia Niittyvuopio
Nuoraidráđi ságadoalli Anni-Sofia Niittyvuopio muitala, ahte Sámis lea dárbu oažžut iežaset nuoraidbargi. Govva: Vesa Toppari / Yle

Sámedikki nuoraidráđđi lea bargan sámenuoraid politihkalaš doaibma- ja ovddidanplánain. Plána lea dahkkojuvvon njealji jahkái ja dat lea nuoraidráđi barggu vuođđun.

Plánas leat 11 ulbmila, main okta dehálapmosiin lea sámegielat nuoraidbarggu ovddideapmi, muitala nuoraidráđi ságadoalli Anni-Sofia Niittyvuopio.

– Mis leat golbma ulbmila nuoraidbargguin: nuoraidbargu, man vuođđun lea sámegiella ja kultuvra, digitála nuoraidbargu min neahttasiidduid bokte, ja de sámegielat nuoraidbargi bálkkáheapmi Sámediggái, čilge Niittyvuopio.

Sámedikki nuoraidráđđi lea bargan De!- ja DigiÁrran-fidnuguin. Nuoraidráđđi joatká bargama guktuin fidnuin, muhto eandalii DigiÁrraniin. Dan olis lea ulbmilin addit sámenuoraide vejolašvuođa buvttadit sisdoalu dego videoid ja teavsttaid sin neahttasiidduide.

Sii almmustahttet maid arvedávgesátnegirjji.

Nuoraidráđđi lea ohcan dáid prošeavttaide ruhtadeami Suoma oahpahus- ja kulturministeriijas.

– De! -fidnu olis leat gávnnahan, ahte sámeguovllus lea dárbu nuoraidbargui. Mii čielggadatge dál dan, ahte leago vejolaš bálkkáhit Sámediggái iežas nuoraidbargi.

– Mis lea plánan ohcat prošeaktaruhtadeami ja bargat ovttas sámeguovllu gielddaiguin sihke eará čanasjoavkkuiguin dainna áššiin, muitala Niittyvuopio.

Guldal olles jearahallama Anni-Sofia Niittyvuopioin dás. Jietna: Xia Torikka / Yle Sápmi

Varrasamosat: Sápmi

Váldoođđasat

Varrasamosat

Muualla Yle.fi:ssä