Sápmi |

Guldal jiena: Ođđa rievdan koronavirushápmi balddihahttá – Doavttir: "Dálá suddjendoaimmat eai oro reahkkámin ođđa virushápmái"

Heidi Eriksen mielde ii lean goittotge vuorddekeahtes ođas, ahte koronavirusis leat gávdnan ođđa variántta.

Heidi Eriksen, Utsjoen vastaava lääkäri
Heidi Eriksen muittuha, ahte vel ii sáhte ložžet koronaráddjehusaiguin. Govva: Anneli Lappalainen / Yle

Juovlamánus gullogohte Eurohpas fuolastuhtti ságat Stuorra-Británnias, go gávnnahedje ahte koronavirusis lea šaddan ođđa dávdahápmi.

Máŋggat riikkat heite buot johtolaga Stuorra-Británniai, muhto liikká dávda leavvagođii eará riikkaide, maiddái earret eará Supmii ja Norgii. Englándda lassin maiddái Mátta-Afrihkás leat gávdnan ođđa dávdahámi koronavirusis.

Dutkamušaid mielde ođđa dávdahápmi njoammu hearkkibut ja leavvá jođánabbo. Vel ii leat goittotge sihkkaris diehtu das, man vearrás dávdda dát rievdan virus dagaha. Ođđa dávdahápmi lea gávdnon eambo mánáin ja nuorain.

Dát ii lean goittotge vuorddekeahtes ođas, dasgo virusat lávejit lunddolaččat rievdat ja dagahit ain ođđa dávdahámi, čilge Ohcejoga vástideaddji doavttir Heidi Eriksen Buorre iđit Sápmi -sáddagis.

– Orru ahte dálá suddjendoaimmat boares koronavirusii eai oro reahkkámin dán ođđa variántii. Dat lea sivvan dasa, manin Englánda lea dál biddjojuvvon oalát gitta, muitala Eriksen.

Ođđa virusvariántta váikkuha vejolaččat boahkuide ja testemii

Loahppajagis máilbmi oaččui viimmat buriid ođđasiid, go koronavirusboahkut dohkkehuvvojedje ja olbmuid leat vehážiid mielde boahkuhisgoahtán. Dál lea goittotge fas ođđa fuolla das, bastetgo dát boahkut dán ođđa virusvariántii.

– Árvalusaid mielde dat dálá boahkut gal vejolaččat dan ođđa virusii bastet. Dego gulaimet THL:s, de dat virus lea olu jo rievdan mannan giđas. Dutkit galget leat olles áigge gozuid alde ja čuovvut mo dat rievdá. Seamma láhkai nugo influeanssaboahkut, mat ráhkaduvvojit juohke jahkái vehá eará láhkai, lohká Heidi Eriksen.

Heidi Eriksen lokte maiddái ovdan fuola teasttaid ektui. Jus virus rievdá sakka, de dálá teasttat eai vealttekeahttá nagot gávdnat dan ođđa virusa.

Eriksen deattuha, ahte lea dehálaš muitit ja čuovvut dearvvašvuođaeiseválddiid addán rávvagiid.

– Dál ii leat áigi ložžet. Mis lea nu lahka dat boahkuheapmi, de mii galgat muitit daid rávvagiid čuovvut. Máŋgasiidda sihkkarit šaddet aisttan koronaváibasat, orru ahte ii šat veaje, muhto mii galggašeimmet bastit čuovvut daid mearrádusaid vel juoga nu áigge.

Heidi Eriksen lei mielde maŋŋebárgga Buorre iđit Sápmi -sáddagis. Guldal jearahallama dás. Jietna: Jaana Kynkäänniemi / NRK ja Inger-Elle Suoninen / Yle

Varrasamosat: Sápmi

Váldoođđasat

Varrasamosat

Muualla Yle.fi:ssä