Sápmi |

Guldal jiena: Ođđasat kultursuorggi ruhtadeami čuohppamis dagahit fuola maiddái sámi dáiddasuorggi boahtteáiggis

Sámi dáidaga doarjjasearvvi ságadoalli Anne Kirste Aikio sávvá, ahte ráđđehus geahččalivčče čoavdit kultursuorggi ruhtadeami muhtun earaláhkái go čuohppamiiguin.

Anne Kirste Aikio
Sámi dáidaga doarjjasearvvi ságadoalli Anne Kirste Aikio lea fuolas, mo kultursuorggi ruđaid čuohppan váikkuhivčče sámi dáiddasuorgái. Govva: Inger-Elle Suoninen / Yle

Guldal maid Sámi dáidaga doarjjasearvvi ságadoalli Anne Kirste Aikio jurddaša dáiddasuorggi boahtteáiggis juos čuohppamat ollašuvvet. Jietna: Inger-Elle Suoninen / Yle

Dáiddasuorgi lea dál duođai rašes dilis. Maŋimus jagiid áigge koronapandemiija lea váttásmahttán dáiddáriid barggu. Dasa lassin oahpahus- ja kulturministeriija lea almmuhan evttohusa 18,4 miljovnna euro čuohppamiin kultursuorgái Veikkaus ruhtaspealuruđaid geahpaneame dihte.

Sámi dáidaga doarjjasearvvi ságadoalli Anne Kirste Aikio lea fuolas čuvvon ođđasiid ja dáiddáriid čállosiid sosiála medias.

– Ovtta láhkai čuohppamat šaddet máŋggageardásažžan koronapandemiija dihte, go mii diehtit, ahte korona lea čuohcán garrasit eandalii ovdanbukti kultursurggiide. Garra jagi mannjel dat leat garra ođđasat, Aikio dadjá.

Sámi dáiddáriidda koronapandemiija čuozai garrasit maid rájiid giddema ektui. Dalle ii lean vejolaš johtit rájiid rastá, eaige lean nu olu ovdanbuktinvejolašvuođat, muittuha Aikio.

Sámi dáidaga doarjjasearvvis lea fuolla olles sámedáidaga suorggis. Sámedáiddárat gártet juo dál geavahit olu áiggi ruhtaohcamušaid čállimii, ja dat váldá áiggi dáiddalaš barggus. Aikio jáhkká, ahte boahttevuođas dáiddárat šaddet ain eanet ohcat ruhtademiid.

– Eanemusat dat várra čuohcá freelance-dáiddáriidda ja daidda, geat barget dáiddasurggiin, muhto maiddái servviide, mat ordnejit bálvalusaid ja maid váldooassi ruhtadeamis boahtá dán stáhtadoarjagis.

Sávvet čuohppamiid sadjái eará čovdosa

Sámi dáidaga doarjjasearvi sávvá, ahte ráđđehus geahččalivčče čoavdit ášši muhtun eará láhkái go čuohppamiiguin. Ságadoalli Anne Kirste Aikio mielas dálá dilis čuohppanplána orru oalle roavis.

– Danhan mii eat oba soaitte diehtit dárkilit, man stuorra mearkkašupmi kultuvrras ja dáidagis lea dákkár spiehkastatáiggis. Maid mii dasto dahkat, go dat oassi unnu ja jávká? Dan mii eat vel dieđe, muhto hui fuolas lean dange bealis.

Eamiálbmogiid filbmafestivála Skábmagovaid bealis Aikio ii leat nu fuolas, danin go dáhpáhus oažžu ruhtadeami maid olu priváhta ruhtafoanddain. Son lea eanetge fuolas filbmasuorggis ja dan sisdoalus.

– Filbmasuorgái lea maid čuohcán koronaáigi. Ja dál čuohppamat jáhkkimis ain váikkuhit filbmadahkkiide ja dan ruhtadeapmái, mii doppe lea oažžumis. Dahkkiid bealis mus lea stuorit fuola go min dáhpáhusa bealis.

Beaivvi ságaid ja Yle Ođđasiid Sámis sáhtát maid guldalit Yle Areenas.

Varrasamosat: Sápmi

Váldoođđasat

Varrasamosat

Muualla Yle.fi:ssä