Sápmi |

Guldal jiena: Ohcejoga gielda hálida álbmotdilálašvuođain gullat, mo Deanu guolástangielddus váikkuha gieldalaččaid eallimii

Bargu lea vuolgán váttes dilis fuolakeahttá bures johtui, ja gielda lea ožžon dál ovtta bargi veardde lasseresurssa koordineret plánenbarggu álggus.

Utsjoen kunnanjohtaja Vuokko Tieva-Niittyvuopio huhtikuussa 2021.
Gielddahoavda Vuokko Tieva-Niittyvuopio muitala, ahte dál sis lea viiddes bargu plánet Ohcejoga ealáhusdoaimma. Govva: Sara Wesslin / Yle

Ohcejoga gielddas lea dál barggu vuolde ráhkadusnuppástusplána, go gieldda ealáhusat gillájit Deanu boahtte geasi guolástangildosis ja eará nuppástusain.

Bargu lea vuolgán váttes dilis fuolakeahttá bures johtui, ja gielda lea ožžon dál ovtta bargi veardde lasseresurssa koordineret plánenbarggu álggus.

– Vaikko dáin ii dábálaččat dakkár njuolga ruhtadandoarjaga oaččo, de dál ovddit beaivve midjiide bođii dakkár positiiva diehtu, ahte mii oažžut bálkkáhangoluide doarjaga, vai mii bastit bálkkáhit ovtta badjelmearálaš bargi dahkat dan álggu koordineren- ja ordnenbarggu, das go dat lea issoras stuorra ollislašvuohta, gielddahoavda Vuokko Tieva-Niittyvuopio muitala.

Bargo- ja ealáhusministeriija lea mieđihan Lappi EJB- ja BE-guovddážiidda 2,3 miljovnna euro sturrosaš lassimearreruđa bargofápmo- ja fitnodatbálvalusaide. Dan ruđas lea váldojuvvon vuhtii maiddái Ohcejoga hohpolaš ráhkadusnuppástus. Ruhta ii boađe goittotge njuolga gildii, baicca EJB-guovddážii ja BE-guovddážii, vai sii bastet buorebut veahkehit daid guovlluid, gos stuorra nuppástusat leat dál dáhpáhuvvamin.

Ohcejoga gielddahoavda Vuokko Tieva-Niittyvuopio muitala Ohcejoga plánain ealáhusdoaimma ja muđuige gieldalaččaid eallima ektui. Jietna: Erkki Gauriloff / Yle

Dál plánenbargu Ohcejogas lea juhkkojuvvon golmma oassái, masa gullet geainnut ja infrastruktuvra, fitnodatdoallu ja bargoeallin ja goalmmádin sámevuohta, vásttolašvuohta ja buresveadjin.

Miessemánu áigge áigot ordnet maiddái álbmotdilálašvuođaid Gáregasnjárggas, Ohcejogas ja Njuorggámis. Dilálašvuođain olbmot ožžot muitalit, mo Deanu guolástangielddus váikkuha sidjiide. Gielda dieđiha čoahkkanemiin dárkilabbot boahtte vahkus.

– Sávan, ahte gieldalaččat boađášedje muitalit, makkár váikkuhusat dán ráfáidahttimis sin eallimii leat, ja fitnodatdoallit, fitnodagat boađášedje muitalit, mo dát váikkuha sin fitnodatdollui, Tieva-Niittyvuopio dadjá.

Varrasamosat: Sápmi

Váldoođđasat

Varrasamosat

Muualla Yle.fi:ssä