Sápmi |

Guldal jiena: Ohcejoga koronanjoammumiid mearri oidno dál THL statistihkain

Ohcejoga gielddas leat dál sihkaraston njoammumat oktiibuot guhtta, main vihtta leat gávnnahuvvon mannan vahku áigge ja okta jo giđđat.

Heidi Eriksen, Utsjoen vastaava lääkäri
Ohcejoga gieldda vástideaddji doavttir Heidi Eriksen muitala, ahte dál borgemánus Ohcejogas leat gávnnahan vihtta koronanjoammuma ja giđđat lei okta njoammun, mas sii eai dieđe dađi eambo. Govva: Anneli Lappalainen / Yle

Ohcejoga gieldda koronanjoammumat leat vahku siste lassánan nu olu, ahte dat oidnojit dál Dearvvašvuođa- ja buresveadjinlágádusa THL statistihkain. THL almmustahttá njoammumiid meriid dalle go gielddas lea leamaš unnimustá vihtta njoammuma.

Ohcejoga gielddas leat THL loguid mielde dál sihkaraston njoammumat oktiibuot guhtta, main vihtta leat gávnnahuvvon mannan vahku áigge ja okta jo giđđat. Gieldda vástideaddji doavttir Heidi Eriksen árvala, ahte giđa njoammun leamaš dakkár olbmos, gii lea girjjiin Ohcejoga gielddas, muhto ássá eará sajes.

– Dat leamaš muhtun Ohcejogas girjjiin leahkki olmmoš, gii lea eará sajis Suomas testejuvvon positiivan, de diet gopmohallá doppe. Dál ohcejohkalaččain leat dát vihtta ja diet okta dalle mannan giđa gos leš, dien áššis mis ii leat dáppe dađe eanet diehtu, muitala Eriksen.

Ohcejoga njoammunbálgás leat gávdnan oktiibuot čieža njoammuma: golbma seaŋgaossodaga pasieanttain, guokte bargiin ja guokte olgobáikegoddelaš oapmahaččain.

Ohcejogas leat váldán ođđa koronateasttaid vuossárgga 24.8. ja bohtosat dain bohtet maŋŋebárgga 25.8., muitala Eriksen. Seaŋgaossodagas dikšot dál pasienttaid goaikkanasnjoammunsuddjenbiergasiin koronanjoammumiid dihte. Olbmot, geat leamaš dahkamušas koronavirusii buohccán olbmuiguin, leat čielggaduvvon ja karantenas.

Eará sámegielddaid oasil eai oidno logut THL statistihkain. Lappi buohccedikšunbiire infekšuvdnadoavttir Markku Broas nannii suoidnemánus Lapin Kansa -aviisii, ahte Eanodagas ledje guokte koronavirusnjoammuma. Anáris vuosttas koronavirusnjoammun gávnnahuvvui jo ođđajagimánus kiinnálaš turisttas.

Guldal Heidi Eriksen jearahallama dás. Jietna: Susanna Guttorm / Yle

Varrasamosat: Sápmi

Váldoođđasat

Varrasamosat

Muualla Yle.fi:ssä