Sápmi |

Guldal jiena: Ohcejoga nuoraidstivrra válgapanelas nuorat jerret ja nuorra gielddaválgaevttohasat vástidit

Gaskavahku válgapanela ulbmil lea boktit nuoraid beroštumi gielddaválggaide. Válgapanelii oasálastet ovcci Ohcejoga gielddaválgaevttohasa.

Joel Väänänen
Ohcejoga nuoraidstivrra lahttu Joel Väänänen lea beroštuvvan politihkas ja sávvá, ahte dát dilálašvuohta bovttášii nuoraid beroštumi politihkkii. Govva: Priváhtta

Mannan háve go Suomas ledje gielddaválggat, dušše vuollái goalmmádas nuorain jienastii válggain. Dál Ohcejogas vigget boktit nuoraid beroštumi gielddaválggaide válgapanela bokte, mas leat mielde Ohcejoga nuorra gielddaválgaevttohasat. Dán jurdaga duohken lea Ohcejoga nuoraidstivra.

Ohcejoga nuoraidstivrra lahttu Joel Väänänen lea ieš beroštuvvan politihkas ja son leage jođiheamen válgapanela otne gaskavahku.

– Galhan dát lea dehálaš. Ulbmil livčče, ahte nu máŋggas go vejolaš beroštuvašedje politihkas ja jienastišgoađášedje.

Väänänen oaivvilda, ahte Ohcejoga nuorat eai leat nu hirbmosit beroštuvvan politihkas, vaikko muhtin politihkas aktiivvalaš nuorat. Son sávvá, ahte beroštupmi lassánivčče.

– Leahan dat buorre, ahte politihkka beroštahttá. Dat bidjá čuovvut dan, mii Suomas dáhpáhuvvá, hábmet oaiviliid, šaddat jienasteaddjin ja váikkuhit dasa, mo riika doaibmá ja man guvlui mannat.

Guldal maid Joel Väänänen muitala válgapanelas. Jearahallan lea suomagillii. Jietna: Sáárá Seipiharju / Yle

Seksuálaveahádagaid sajádat, dálkkádat ja skuvlejupmi beroštahttet nuoraid

Joel Väänänen mielde buot válgapanela gažaldagat gusket nuoraid ja gieldda boahttevuođa. Ohcejoga badjedási ja logahaga ohppiin lea leamaš vejolašvuohta jearrat gažaldagaid.

– Doppe geardduhuvvojedje ovdamearkka dihtii seksuálaveahádagaid sajádat, dálkkádat, skuvlejupmi ja dat, ahte mo oažžut nuoraid bissut gielddas, čilge Väänänen.

Nuorat leat mearridan váldit válgaságastallamii dušše nuorra evttohasaid, ja juos man nu bellodagas eai leat nuorra evttohasat, de dasto easkka lea lohpi sáddet muhtun eará evttohasa. Válgapanelii oasálastet ovcci evttohasa.

Kaisa Tapiola-Länsman
Ulbmilin lea boktit nuoraid beroštumi gielddaválggaide ja nuorat leat ieža beasan mearridit gažaldagaid evttohasaide, muitala Ohcejoga gieldda astuáiggečálli Kaisa Tapiola-Länsman. Govva: Vesa Toppari/Yle

Ohcejoga gieldda astuáiggečálli Kaisa Tapiola-Länsman oaidná, ahte dákkár dilálašvuhtii lea dárbu.

– Hui unnán Ohcejogas leamašan válgaságastallamat, ahte besset dasto buktit dieid oaiviliid ovdan, maid dat nuorat háliidit dasto diehtit.

Válgapanela ordnejuvvo otne gaskavahku 12.5 diibmu 18 ja dat dulkojuvvo. Dilálašvuođa lea vejolaš čuovvut gáiddusin sáme- dahje suomagillii. Ohcejoga gieldda neahttasiidduin almmuhuvvo liŋka, gos dáhpáhusa sáhttá čuovvut. Eanet dieđut gávdnojit panela Facebook-dáhpáhusas.

Guldal maid Kaisa Tapiola-Länsman muitala válgapanelas. Jietna: Anneli Lappalainen / Yle

Yle Ođđasiid Sámis ja Beaivvi ságaid sáhtát maid guldalit Yle Areenas.

Varrasamosat: Sápmi

Váldoođđasat

Varrasamosat

Muualla Yle.fi:ssä