Sápmi |

Guldal jiena: Ohcejogas dahke rávvagiid vai turisttat doaimmaše vásttolaččat, go luomostallet guovllus

Go turismasuorgi lea olles fárttain lassáneamen maiddái Suoma davimus guovlluin, háliida Ohcejoga gieldda lasihit dieđu guovllu birra ja maiddái das, mo turisttat sáhttet láhttet mátkki alde vásttolaččat.

Utsjoen kunnan matkailualan koordinaattori Sonja Sistonen
Ohcejoga gieldda turismasuorggi koordináhtor Sonja Sistonen mielas buot dehálamos lea, ahte Ohcejoga áidnalunddot vuoigŋa seailu, vaikko turisma lassánage. Govva: Sonja Sistonen

Ohcejoga gielddas ráhkkanedje lassánan turismii ođđa vásttolaš rávvagiiguin, main mátkkálaččat ožžot dieđu Ohcejoga guovllu ja kultuvrra birra.

– Ohcejogas turisma lassána olles áigge ja mii háliidit čoavdit vejolaš váttisvuođaid juo ovdal go dat dáhpáhuvvet. Mii háliidit seailluhit Ohcejoga áidnalunddot vuoiŋŋa ja dan ahte báikegotti olbmot eai gillášedje turismaealáhusas, muitala Ohcejoga gieldda turismasuorggi koordináhtor Sonja Sistonen.

Varas vásttolaš rávvagiiguin leat iskan earret eará muittuhit mátkkálaččaid rašes luonddus, bohccoealáhusas, sámekultuvrras ja máŋgga earálágán doaimmain, maid turista sáhttá váldit vuhtii iežas mátkkis.

– Okta ovdamearka lea nuoskideapmi luonddus. Váidalahtti dáppege leat gávnnahan duorgguid luonddus, main eallit leat maiddái gillán, dadjá Sistonen.

Sonja Sistonen muitala, ahte dálá dilis Ohcejogas eai leat olu leamašan stuorra váttisvuođat, muhto konkrehta ovdamearkkat leat eará guovlluin, gos turisma lea dagahan unohas dáhpáhusaid báikegotti olbmuide ja maiddái Sámi lundui.

– Leat oaidnán, ahte mii dárbbašit vásttolašvuhtii vuođđuduvvi barggu ja danin mii háliidit minimiseret juo ovddalgihtii daid váttis diliid, maid mátkeealáhus soaitá mielddisbuktit, muitala Sistonen.

Beaivvi ságaid ja Yle Ođđasiid Sámis sáhtát maid guldalit Yle Areenas.

Varrasamosat: Sápmi

Váldoođđasat

Varrasamosat

Muualla Yle.fi:ssä