Sápmi |

Guldal jiena: Ohcejogas ja Anáris gávdnon koronanjoammumat – njoammunbálgá guorran ja gártenbargu leat jođus

Ohcejoga gielddahoavda Vuokko Tieva-Niittyvuopio mielde koronanjoammuma gáldu ii leat vel dieđus dán muttus.

Utsjoen kunnanjohtaja Vuokko Tieva-Niittyvuopio.
Ohcejoga gielddahoavda Vuokko Tieva-Niittyvuopio mielde áššis dieđihuvvo eanet maŋŋá. Govva: Vesa Toppari / Yle

Ohcejoga gielddas lea odne duorastaga 26.11. gávnnahuvvon positiiva koronavirusčájánas jođánis koronateasttain.

Ohcejoga gielddahoavda Vuokko Tieva-Niittyvuopio mielde njoammunbálgá guorrama ja gártema leat álggahan gielddas.

Vel eai sáhte muitalit, gos njoammun lea vuolgán ja man ollugat leat njoammunáitaga vuolde.

– Munnje lea boahtán jođiheaddji doaktáris diehtu, ahte positiiva koronateasta lea dahkkojuvvon gielddas ja teastta sihkkarastet PCR-teasttain ja čájánasat leat sáddejuvvon Roavvenjárgii, muitala Tieva-Niittyvuopio.

Koronanjoammuma ožžon olmmoš lea sirrejuvvon ja čielggadanbargu lea jođus.

– Ovttaskas olbmot, geat leat gártan njoammunáitaga vuollái leat biddjon erremii, muhto vel joatkit vejolaš njoammunáitaga vuollái gártan olbmuid gártema ja ášši čielggadeami, dadjá Tieva-Niittyvuopio.

Ášši čielggaduvvo dađistaga ja Tieva-Niittyvuopio mielde sus ii leat diehtu das, gos njoammun lea álgán.

– Dat lea muittuhus, ahte epidemiija lea maid mis dáppe. Buohkat mii galgat muitit rávvagiid, mat leat boahtán sihkkarastindoaimmain, dadjá Tieva-Niittyvuopio.

Ohcejoga gieldda koronabargojoavku čoahkkana juohke vuossárgga gártet koronadili.

– Olles áigge mii beaivádit dili ja ráhkkanit dasa, ahte mo mii doaibmat, jus epidemiija leavvagoađášii dáppe, muitala Tieva-Niittyvuopio.

Gielda dieđiha áššis maŋŋá, go sis lea eambbo sihkkarastojuvvon diehtu.

Anáris gávnnahuvvon okta koronanjoammun

Maiddái Anár gielddas leat gávnnahan ovtta koronavirusnjoammuma. Lappi buohccidikšunbire bajit infekšuvdnadoavttir Markku Broas mielde njoammumat sáhttet laktásit Levis vahkkoloahpa ordnejuvvon máilmmicup-gilvvuid eahketdoaluide.

Vel ii leat sihkkar, man máŋgasat leat gártan njoammunáitaga vuollái sihke Ohcejogas ja Anáris. Goappáge gielddas čielggadit ášši.

– Go bargu lea gaskan, ávžžuhan sakka njoammundávddaid vástideaddji doavttirin dan, ahte gieldda olggobeale speallandáhpáhusat ja speallanmátkkit šluhttejuvvojit 6.12. rádjai. Seamma ávžžuhus guoská gieldda guovllus ordnejuvvon speallandáhpáhusaid, maidda oassálastet olbmot gielddarájiid olggobealde, dadjá Anár gieldda jođiheaddji doavttir Outi Liisanantti dieđáhusas.

Guldal dás Ohcejoga gielddahoavdda Vuokko Tieva-Niittyvuopio jearahallama. Jietna: Laura Pieski / Yle

Dievasmahttojuvvon 26.11.2020 diibmu 13.44 bajilčála Ohcejogas ja Anáris gávdnon koronanjoammumat

Varrasamosat: Sápmi

Váldoođđasat

Varrasamosat

Muualla Yle.fi:ssä