Sápmi |

Guldal jiena: Ohcejogas ordnegohtet sámegielat gáfestallanbottuid ja máŋggalágan sámegielgurssaid

Deanuleagis sámástit -prošeakta fállá ovttasbarggus Ohcejoga sámelogahagain vejolašvuođa čađahit sámegielgurssaid. Dasa lassin juohke gaskavahkko lea vejolaš hárjehallat sámegiela hállama gáfestallanbottus.

Laura Arola
Laura Arola illuda, go máŋgasat leat juo almmuhan iežaset sámegielgurssaide. Govva: Laura Arola

Laura Arola muitala makkár sámegielgurssaid Ohcejogas fállagohtet ja manin. Jietna: Sáárá Seipiharju / Yle

Ohcejogas álget dán čavčča máŋggalágán sámegielgurssat. Deanuleagis sámástit -prošeakta ja Ohcejoga sámelogahat fállet logahaga vierisgiela oahppomeari mielde davvisámegiela álgogurssa ja joatkkagurssaid rávesolbmuide.

– Logahat lea ordnen jo muhtun jagi gielddabargiide sámegielgurssaid. Dál leat ordnemen daid ovttas logahagain nu, ahte dat leat buohkaide, geat háliidit searvat, muitala Laura Arola Deanuleagis sámástit -prošeavttas

Máŋgasat leat juo almmuhan iežaset gurssaide, muitala Arola. Son lea duhtavaš dasa, ahte olbmot leat beroštuvvan searvat.

Gáfestallanbottuin sáhttá hárjehallat hállat sámegiela

Prošektii lei boahtán sávaldat ordnet muhtunlágan báikki, gos sáhttá ságastallat ja hárjehallat sámegiela hállama. Dál čakčat sii leat ollašuhttimen dán sávaldaga.

– Mii leat ordnen dakkár ságastallangáfestallanbottu, mii lea álo gaskavahkko. Dasa sáhttá áibba friddja boahtit. Mis lea álo juoga fáddá ja sátnelistu das veahkkin, de beassá hárjehallat hállama.

Gáfestallanboddu lea jurddašuvvon daidda, geat hárjehallet sámegiela hállama, muhto maiddái eatnigielat hállit leat buresboahtin oahpahit ja ságastallat.

– Háleštanbottuin leat jurddašan daid olbmuid, geat eai leat ožžon giela ruovttus, muhto leat gullan dan álo ja geain lea dákkár šielbmá hállagoahtit sámegiela.

Buohkat eai oahpa čohkohallamen gurssain – danin fállet maid sámegielat yoga ja álšasále

Deanuleagis sámástit -prošeavttas háliiditge fállát máŋggalágán doaimmaid, maiguin ealáskahttit sámegiela. Sámegiela lea vejolaš gullat ja hárjehallat maiddái sámegielat yogas neahta bokte ja sámegielat álšasáles.

– Mii leat fuomášan, ahte muhtun olbmuide heive álšasále, ahte sidjiide lea dakkár fysalaš doaimma bokte álkit hállagoahtit, ja muhtun olbmot háliidit dákkár ráfálut gáfestallama.

Eanáš dát gurssat leat Ohcejotnjálmmis dahje dasto gáiddusin. Arola muitala, ahte sii mielas gal ordnešedje gurssaid maid Gáregasnjárggas ja Njuorggámis, muhto eai leat gávdnan báikki ala oahpaheaddjiid.

Yle Ođđasiid Sámis ja Beaivvi ságaid sáhttá guldalit Yle Areenas.

Varrasamosat: Sápmi

Váldoođđasat

Varrasamosat

Muualla Yle.fi:ssä