Sápmi |

Guldal jiena: Ohcejogas ovdanbuktet teáhterteavsttaid korona dagahan rádjedilis – "Go dilli lea nu duođalaš, mii berrešeimmet diehtit reaškit"

Siri Broch Johansen lea leamaš dán vahkus čállimen teáhterteavsttaid, maid ovdanbuktet 23.7. Áilegasdálus Ohcejohnjálmmis.

Siri Broch Johansen
Siri Broch Johansen lea čállán lávdeteavsttaid korona dagahan dálá rádjedili birra. Govva: Aslak Mikal Mienna

Áilegasdálus Ohcejohnjálmmis leat dán vahkus bargan ođđa teáhterteavsttaiguin. Korona dagahan dálá rádjedilis leat geahččalan dahkat somás čájálmasa.

Teavsttaid lea leamaš čállimen Siri Broch Johansen, Sara Margrethe Oskal lea bagadalli, ja Áilu Valle ja Eila Ballovara Varsi leaba neavttárat.

Teáhterteavsttaid ovdanbuktet odne bearjadaga 23.7. diibmu 18.00 Áilegasdálus Ohcejohnjálmmis, ja sisabeassan lea nuvttá.

Siri Broch Johansen ássá Deanuleagis, ja sus leat skihpárat guktuid bealde rájá. Dál go rádjá lea koronadili dihte leamaš gitta ja leat leamaš iešguđetlágán njuolggadusat, de rádjeguovllu ássit leat duššastuvvan eambo ja eambo.

Dát de bohciidahtii jurdaga fáddá ovdanbuktimis maiddái teáhtera bokte.

– Mus leat muhtimat skihpárat Suoma bealde, geat álge muinna háleštit go mun čálán teáhterbihtáid. Lohke, ahte galggašeimmet juoidá ráhkadit lávddi ala dáid dáhpáhusaid birra, go nu olu ártegis áššit gevvet dál. Maiddái dan dihte, go eiseválddit besset dál fámostallat nu mo eai leat beassan goassige ovdal. Dát riikarádji ii leat leamaš nu gitta goassige ovdal, ii máilmmisoađi áiggege.

– Dát lea hui duođalaš dilli, ja go dilli lea nu duođalaš, mii berrešeimmet diehtit reaškit, dadjá Johansen ja joatká, ahte reaškkas veahkeha nagodit eallit dili čađa.

Vaikko gieđahallet váivves ášši, lea teáhterbihtá hárjehusain leamaš somá, muitala Broch Johansen.

– Mii viggat gávdnat daid ártegis vásáhusaid ja dáhpáhusaid, mat bohtet go mii eallit ártegis dilis.

Broch Johansen muittuha, ahte sáhka ii leat gárvvis čájáhusas.

– Mii vázzit báhpáriiguin, mii eat leat gárvásit hárjehallan maidege. Mii leat čájehallamin mainna mii leat bargamin.

Siri Broch Johansen muitala makkár čájálmasa sii leat válbmemin. Jietna: Jouni Aikio / Yle

Varrasamosat: Sápmi

Váldoođđasat

Varrasamosat

Muualla Yle.fi:ssä