Sápmi |

Guldal jiena: Ohcejogas vuosttas koronanjoammun – “Dát lea duođalaš muittuhus koronas”

Ohcejoga seaŋgaossodaga koronanjoammuma geažil dearvvašvuođaguovddáš dikšu dušše hohpolaš áššiid.

Heidi Eriksen
Ohcejoga gieldda jođiheaddji doavttir Heidi Eriksen muitala, ahte sii leat dál čielggadeame gos koronavirus lea njommon seaŋgaossodahkii. Govva: Vesa Toppari / Yle

Ohcejoga gielddas lea gávnnahuvvon vuosttas koronanjoammun. Njoammun gávdnui Ohcejoga seaŋgaossodaga pasieanttas vuossárgga 17.8. Jearaldat lea seamma njoammumis, mas Anára gielda dieđihii maŋŋebárgga. Ohcejoga seaŋgaossodaga pasieanta lea sirdojuvvon dikšui Avvila dearvvasvuođaguovddážii.

Ohcejoga gieldda jođiheaddji doavttir Heidi Eriksen muitala, ahte sii leat kártegoahtán buot dáid olbmuid, geat leamašan dáhkamušas koronavirusii buohccán olbmuin.

– Mii leat váldán koronateasttaid olles seaŋgaossodagas ja maiddái buot dearvvašvuođaguovddáža bargiin. Leat maiddái leamašan oktavuođas oapmahaččaide ja ovdánit dál beaivvi ain hávil. Dál justa dát čuohcá seaŋgaossodaga buohcciide ja divššáriidda, min dearvvašvuođasuorggi bargiide ja vejolaččat muhtin ovttaskas olggo beale olbmuide, muitala Eriksen.

Teastabohtosiid vurdet gárvánit maŋemustá ihttážii

Ohcejoga dearvvasvuođaguovddážis, Dorvus, Aspas ja Seitakartanos lea dán dilis gallestallangielddus. Maiddái dearvvasvuođaguovddáža maŋŋebárgga vuostáiváldináiggit leat šluhttejuvvon. Dearvvasvuođaguovddáš almmuha joatkagis sierra.

Heidi Eriksena mielde sii geahččalit dál čielggadit njoammunbálgá.

– Mii kártet dan olles áigge. Go lasseteasttat válbmanit, de mii diehtit vehá eanet, ahte gos dat lea sáhttán boahtit.

Eriksen deattuha, ahte dearvvašvuođaguovddáža bargonávccat leat dál biddjon čielggadanbargui.

– Dieđusge mii fertet prioriseret dán čielggadanbarggu, nu ahte ii nu hohpolaš áššiid mii fertet sirdit dobbelebbui.

Koronanjoammun čuohcá earenomážit Ohcejoga seaŋgaossodaga doibmii.

– Mii leat sirren dakkár pasienttaid seaŋgaossodagas, geain vejolaččat leat koronadávdamearkkat. Teastabohtosiid mii vuordit gárvánit odne eahkes dahje maŋemustá ihttin iđđes. Mis leat dál dakkár bargit seaŋgaossodagas, geat leat suddjen iežaset, muitala Eriksen.

Jođiheaddji doavttir jeđđesta gieldalaččaid váldit gulul. Seammás son goit muittuha buohkaid koronarávvagiin.

– Dál oažžu leat áibba ráfis. Dát lea goit duođalaš muittuhus das, ahte mii fertet muitit dan korona, fuolahit gaska ja giehtahygienia ja suddjet riskajoavkkuid. Máskaávžžuhus guoská maiddái Ohcejohkii, muittuhastá Heidi Eriksen.

Dá gulat Heidi Eriksen jearahallama. Jietna: Anni-Saara Paltto / Yle

Varrasamosat: Sápmi

Váldoođđasat

Varrasamosat

Muualla Yle.fi:ssä