Sápmi |

Guldal jiena: Ohcejohka šearrá -temávahkku vuolgán johtui – dorvvolašvuođa dihte eanáš dáhpáhusain ordnejuvvo olgun

Ohcejohka šearrá -temávahkku lea álgán odne mánnodaga čuovgagovvačájáhusain ja nohká lávvardaga konsearttaide.

Kaisa Tapiola-Länsman, vapaa-aikasihteeri, Utsjoen kunta
Ohcejoga gieldda astuáigečálli Kaisa Tapiola-Länsman sávvá, ahte Ohcejohka šearrá -temávahkus boađášii jahkásaš dáhpáhus. Govva: Anneli Lappalainen / Yle

Ohcejohka šearrá -temávahkku lea vuolgán johtui odne mánnodaga 5.7. Deanu suhkkit -čuovgagovvačájáhusain. Vahku áigge leat iešguđetlágán dáhpáhusat, earet eará vázzintuvrrat girkostobuin, sámemusihka bargobájit nuoraide sihke filmmat ja konsearttat.

Temávahku maŋimuš beaivve, lávvardaga 10.7. lea olles beaivvi bearašdáhpáhus, man prográmmas lea panelaságastallan Atlántta luosas ja Deanu iešmearrideamis, konsearttat, teáhter ja girječálligalledeapmi. Konsearttain loaiddasteamen leat Yungmiqu ja Jezebro, Vildá, Ailu Valle ja sus skihpárin DJ Uyarakq. Girječállin galleda Niillas Holmberg.

Korona lea dieđusge váldon vuhtii dáhpáhusa ordnemis, muitala Ohcejoga gieldda astuáigečálli Kaisa Tapiola-Länsman.

– Miihan fertet nu máilmmi dorvvolaš dáhpáhusa ordnet go vejolaš. Stuorámus oassi dáhpáhusain lea olgun, ja miihan doaivut ahte oktage gii lea vehá buozus, ii boađe báikki ala. Dieđusge ávžžuhit buohkaid geavahit máskka ja doallat buorre hygienias fuola.

Ohcejoga gielda ordne temávahku ovttasbarggus Deanuleagis sámástit -prošeavttain, Sámi Siida -searvviin, Sámedikki nuoraidráđiin, Lappi lihtuin sihke báikkálaš fitnodagaiguin ja servviiguin.

– Mis leat gielddas hui unnán bargit ja muđuige unnán olbmot dáppe, nu mii fertet ovttasbarggus ordnet vai fidnet ollašuvvat dákkár stuorát dáhpáhusa. Dieđusge dát priváhttaolbmot, searvvit ja fitnodagat, mii dárbbašit maiddái sin doarjaga, dadjá Tapiola-Länsman.

Tapiola-Länsman sávvá, ahte Ohcejohka šearrá -temávahkut ordnejuvvošedje ain boahttevuođasge.

– Áinnas doaivvun, ahte das boađášii dakkár jahkásaš dáhpáhus, muhto oaidnit leš mo dat boahtte jagi, leabat dalle ain dat luossabivdingielddus fámus ja ordnejitgo luossariemuid.

Temávahku olles prográmma gávnnat dáppe.

Ohcejogas ordnejuvvo dán vahkus Utsjoen Lumo – Ohcejohka šearrá -temávahkku. Ohcejoga gieldda astuáigečálli Kaisa Tapiola-Länsman muitala makkár vahkku lea vuordimis. Jietna: Anja Kaarret / Yle

Yle Ođđasiid Sámis ja Beaivvi ságaid sáhtát maid guldalit Yle Areenas.

Varrasamosat: Sápmi

Váldoođđasat

Varrasamosat

Muualla Yle.fi:ssä