Sápmi |

Guldal jiena: Ohcejohkii válljejuvvon rektor ja čuvgehushoavda

Ohcejoga gieldda čuvgehuslávdegotti ságajođiheaddji Elle-Káre Aikio muitala, ahte gieldda boahtte čavčča oahpaheaddjidili lea dál buoret go guhkes áigái.

Elle Aikio
Ohcejoga gieldda čuvgehuslávdegotti ságajođiheaddji Elle-Káre Aikio. Govva: Yle / Kirsti Länsman

Ohcejoga gieldda rektora virggiide leat dál válljejuvvon olbmot. Čuvgehuslávdegoddi lea deavdán Ohcejohnjálmmi skuvlla ja Sámelogahaga rektora virggi. Dasa lea válljejuvvon njealji ohccis Pasi Oikarinen.

Gielddastivra fas válljii gielddaráđđehusa evttohusa mielde čuvgehushoavda-rektora. Gielddaráđđehus jearahalai golbmasa ja válljii mihcamárvahkus virgái Juha Peteri ja várresadjái Virpi Veskoniemi. Váldostivra nannii válljema. Válljema maŋŋá Peteri almmuhii ahte son ii váldde virggi vuostá ja Virpi Veskoniemi lei gearggus álgit virgái.

Dán jagi buorre dilli oahpaheaddjiid ektui

Boahtte čavčča oahpaheaidilli Ohcejoga gielddas orruge dál buoret go guhkes áigái, dadjá Ohcejoga gieldda čuvgehuslávdegotti ságajođiheaddji Elle-Káre Aikio.

– Mis ii leat goassege ovdal leamašan ná buorre dilli go dál boahtte lohkanjahkái, jos geahččá oppalašvuođa. Mis leat buot virggit suomagielat oahpahusas devdojuvvon ja dasa lassin buot diibmooahpaheaddjibáikkiide mii leat ožžon olbmuid geat leat boahtimen. Ohcejohnjálmmis ja Njuorggámis leat buot sámegieloahpahusa virggit ja sajit devdojuvvon.

Gáregasnjárgii leamaš dattege váttis gávdnat buot virggiide oahpaheaddjiid.

– Gáregasnjárga lea áidna, gos lea hástalus oažžut bargiid geain lea gelbbolašvuohta, muitala Aikio.

Guldal dás Ohcejoga gieldda čuvgehuslávdegotti ságajođiheaddji Elle-Káre Aikio jearahallama. Jietna: Yle Areena.

Varrasamosat: Sápmi

Váldoođđasat

Varrasamosat

Muualla Yle.fi:ssä