Sápmi

Guldal jiena: Oula Antti Labba bargagođii Sámiráđi olmmošvuoigatvuođaossodaga juristan – "Sisabahkkemiiguin galgá leat álot gožuid alde"

Jurista Oula-Antti Labba oaidná, ahte barggu váldoulbmilin lea gozihit sámiid ovdduid álbmogin ja nannet sámiid oktiigullevašvuođa riikkarájáid rástá.

Oula-Antti Labba
Oula-Antti Labba lea erenoamážit beroštuvvan álgoálbmogiid vuoigatvuođain ja áššiin mat gusket álgoálbmogiid iešmearridanvuoigatvuođaide. Govva: Pirita Näkkäläjärvi

Sámiráđđi lea virgádan Oula-Antti Labba juristan olmmošvuoigatvuođaossodahkii.

Labba lea Eanodagas eret, muhto ássá dál Anáris ja Helssegis. Labba lea jurista, geas lea erenoamáš vásáhus olmmošvuoigatvuođa áššiiguin ja lea ovdal bargan Sámedikkis ja Minority Rights Group International -olmmošvuoigatvuođaorganisašuvnnas.

Sus leat alla vuordámušat ođđa bargui, mas beassá bargat riikkarájáid rastá sihke sámeáššiiguin, muhto maid álgoálbmotáššiiguin.

– Sámis beassá bargat davviriikkalaš dásis ja maiddái Ruošša beale áššiiguin, mat gusket Ruošša beale sámiid. Váldoulbmilin lea gozihit sámiid ovdduid álbmogin ja nannet sámiid oktiigullevašvuođa riikkarájáid rástá.

Barggustis Labba boahtá oassálastit riikkaidgaskasaš doaimmaide nugo ON proseassaide. Báikkálaš dásis son bargá sámiid vuoigatvuođaid guoskevaš áššiiguin miehtá Sámi.

Labba lea erenoamážit beroštuvvan álgoálbmogiid vuoigatvuođain ja áššiin, mat gusket álgoálbmogiid iešmearridanvuoigatvuođaide. Juo ovdal láhkaoahpuid son studerii riikkaidgaskasaš politihka. Álgoálbmotáššit leat sutnje sápmelažžan dehálaččat.

– Mu konkrehta bargu lea justa dat juridihkalaš áššedovdamuš, man mun háliidan dan barggu bokte buktit ovdan. Munnje lea lunddolaš, go lean ieš sápmelaš ja álot čuvvon sámeáššiid, muhto maiddái álgoálbmot áššiid. Riikkaidgaskasaš áššiin ja álbmogiid gaskasaš áššiin lean álot leamašan beroštuvvan, muitala Labba.

Háliida ovddidit dan, ahte sámiid rievttit dovddastuvvojit riikkaidgaskasaš soahpamušaid mielde

Sámiid vuoigatvuođaid ektui leat ain máŋggalágan hástalusat. Oula-Antti Labba namuha, ahte sámiid riektesajádat ii leat juohke riikkas dovddastuvvonge. Ovdamearkka dihte Ruošša ii leat dovddastan iežas siskkáldas láhkaásaheamis sámiid rivttiid.

– Dieinna lágiin geahččalit ovddidit dan, ahte sápmelaččaid rievttit dovddastuvvojit nugo riikkaidgaskasaš soahpamušaid mielde galggalii leat dovddastuvvon, smiehtada Labba.

Maiddái sierralágan sisabahkkemat dahjege industriijasuorggi plánat leat olu sámeguovllus. Son háliida barggustis sihkkarastit dan, ahte sápmelaččaid oaidnu gullo ja oidno.

– Dađi bahábut miehtá Sámi leat sierralágan sisabahkkemat. Leat industriijasuorggi plánat, nugo ruvkeplánat ja ovdamearkka dihte bieggamillopárkkat ja Jiekŋameara ruovdemáđija. Dat leat hui fuolastuhtti áššit ja galgá leahkit olles áigge gozuid alde dákkár áššiin vai bastá dasto duosttut ja bissehit sisabahkkemiid, dadjá Labba.

Varrasamosat: Sápmi

Váldoođđasat

Varrasamosat

Muualla Yle.fi:ssä