Sápmi |

Guldal jiena: Pinja Pieski váillaha viidásut ságastallama sámi servodagas sohkabeallerollain

Earásohkabealát Pinja Pieski sávášii, ahte ságastallan sohkabeallerollain álggašii jo árrabajásgeassima rájes.

Pinja Pieski
Pinja Pieski hálidivčče, ahte servodat muitá arvedávgesámiid earáge áigge go dušše Pride-dáhpáhusaid oktavuođas. Su mielas arvedávgeolbmuid galggašii muitit buot doaimmain. Govva: Linda Tammela / Yle

Earásohkabealát Pinja Pieski oaivvilda, ahte sámi servodagasge gávdno mirkkolaš maskulinitehta ja livčče dehálaš gieđahallat dan.

– Miihan eat leat sierra dán oarjemáilmmi váikkuhusas. Lea hirbmat dehálaš maid guorahallat min geahččanguovllus dáid áššiid ja smiehttat, mat váttisvuođat doppe leat, dadjá Pieski.

Pieski hálidivčče eambbo ságastallat namalassii ovdamearkka dihte sámegielat fuolkesániin.

– Mis leat dievva fiinna fuolkesánit ja dat leat sohkabeallái navdojuvvon. Mu mielas galggašii hutkat ođđa sániid.

Su mielas livčče dehálaš álggahit ságastallama jo árrabajásgeassimis. Pieski mielas galggašii beassat eret dan vuogis, ahte leat beare nieiddat ja gánddat.

Pinja Pieski lei mielde Buorre iđit Sápmi -sáddagis vuossárgga 2.8.2021. Jietna: Yle Areena

Sápmi Pride lágiduvvo dán vahkus Ohcejogas

Sohkabeallái čatnon giela birra lea ulbmil ságastallat lasi vahkuloahpas Sápmi Pride -dáhpáhusas Ohcejogas. Arvedávgeleavggat libardit Ohcejogas Borgemánu 5.–8. beaivve. Dáhpáhusbáikin lea Ohcejohka gilli ja Gieddemielli.

Dáhpáhusa prográmmas lea earet eará ráidovázzin, bargobájit, panelaságastallan ii-binára ja binára gávttiid birra ja open stage -eahket. Dáhpáhusa lágideaddjin lea Pinja Pieski.

Pieski sávašii, ahte servodat muitá arvedávgesámiid earáge áigge go dušše Pride-dáhpáhusaid oktavuođas. Su mielas arvedávgeolbmuid galggašii muitit buot doaimmain.

Sápmi Pride -dáhpáhusa lágideaddjit leat almmustahttán čuovvovaš prográmma, mii sáhttá vel rievdat.

Duorastat 5.8.

15.00 – 18.00 Other Comics bargobádji Ohcejohnjálmmi skuvllas: govvaráiduprojeakta Heidi Lunabbain Sámi LGBTQIA+ olbmuide

18.15 Rahpansánit skuvllas ja livestream bokte

18.30 Muitát-prošeavtta ságastallan Siida Musea várás skuvllas

Bearjadat 6.8.

11.00 – 14.00 Other Comics Bargobádji joatkášuvvá skuvllas

14.00 – 16.00 Plákahtaid bargobádji ráidovázzima várás skuvllas

16.00 – 19.00 Siida Musea pop-up vuovdin Gieddemiellis

17.00 – 19.00 Siidaskuvlla Lávostallanvierut bargobádji Gieddemiellis

19.00 – 21.00 Niegadanboddu Ellos Deatnu -lávus Gieddemiellis

Lávvordat 7.8.

10.00 – 12.00 Brunša ja maŋimus plákahtat skuvllas

12.00 – 13.00 Ráidovázzin ja fánasráidu, vuolggasadji skuvllas

13.00 – 16.00 Mánáid stoahkansadji Gieddemiellis

13.30 – 15.00 Panealaságastallan (davvisámegillii) Gieddemiellis ja livestream bokte: Sohkabeallái čatnon giella

15.30 – 16.46 Panealaságastallan (eaŋgasgillii) Gieddemiellis ja livestream bokte: Naba juos binára gávttiiguin ii leat oadjebas dovdu?

18.30 – 19.00 Arvedávgeustilaš eahketmeassu Ohcejoga girkus

20.00 – 22.00 Rabas lávdi Gieddemiellis

Sotnabeaivi 8.8.

12.00 Reflekšuvdna, jurddabeassi čuovvovaš Sápmi Pridei, giitosat Gieddemiellis

14.00 Vuoiŋŋalaš sávaldatlávlagat ja gáffe Ohcejoga girkus

Duorastagas sotnabeaivái 5.8.-8.8.

Arvedávgegirjjálašvuođa čájáhus Ohcejoga girjerádjosis

Arvedávgemánaidgirji vuovdin: Julian lea ábiruvvá (davvi-, julev- ja máttasámegillii) skuvllas ja Gieddemiellis

Yle Ođđasiid Sámis ja Beaivvi ságaid sáhtát maid guldalit Yle Areenas.

Varrasamosat: Sápmi

Váldoođđasat

Varrasamosat

Muualla Yle.fi:ssä