Sápmi |

Guldal jiena: Plakáhtagilvvuin háliidit fidnet mánáid jurddašit dálkkádatrievdama váikkuhusaid Sápmái

Mánát ja nuoratge áicet, mii birrasis dáhpáhuvvá ja danin Sámi mánáidkulturguovddáš bijai plakáhtagilvvu johtui.

Petra Magga-Vars
Sámi mánáidkulturguovddáš Mánu doaimmajođiheaddji Petra Magga-Vars lohká, ahte dákkár gilvu lea buorre ovdamearkka dihte skuvllaide, gos oahpaheaddjiin sáhttá seammás ságastallat fáttás. Govva: Linnea Rasmus / Yle

Sámedikki mánáidguovddáš Mánnu ordne plakáhtagilvvu mánáide ja nuoraide. Gilvvu ulbmilin lea čalmmustahttit dálkkádatrievdama. Gilvvus mánát ja nuorat sáhttet váldit beali dálkkádatrievdamii ja muitalit iežaset jurdagiid fáttás friddja govvadáidaga vugiin.

– Fáddán lea dálkkádatrievdan, mo dat váikkuha min eallimii dáppe davvin, álgoálbmogiidda, elliide, lundui, birrasii ja min ealáhusaide, muitala mánáidkulturguovddáža doaimmajođiheaddji Petra Magga-Vars.

Dárkkuhus lea govain muitalit dálkkádaga rievdamis ja loktet ášši maid mánáid ja nuoraid dássái. Magga-Vars atná dehálažžan, ahte mánát ja nuoratge besset čájehit, maid sii jurddašit dálkkádatrievdamis.

Máŋggat sámemánát ja -nuorat leat maid mielde boazodoalus. Diibmá garra dálvi leage dihtton máŋgasiid eallimis, nuba dat lea okta ášši, mii bohciidahtii jurdaga dákkár gilvvus. Magga-Vars lohká, ahte mánát ja nuorat gal áicet máilmmi dili.

– Dat sihkkarit boahtá oalle lahka máná eallima, konkrehtalaččat, jurddaša Magga-Vars.

Gilvu lea jođus skábmamánu 11. beaivvi rádjai ja das leat njeallje ahkeluohká álo 7 jagis gitta 18 jahkásažžii.

Mánáidkulturguovddáža plakáhtagilvu bidjá jurddašit dálkkádatrievdama. Jietna: Linda Tammela / Yle

Varrasamosat: Sápmi

Váldoođđasat

Varrasamosat

Muualla Yle.fi:ssä