Sápmi |

Guldal jiena: Rádjeguovllu ássit johtiba Suoma bealde Norggas barggus – “Mii fertet leat buohkat várrugasat”

Rádjeguovllu ássit sáhttet johtit Norggas barggus. Barggus johtimii gáibiduvvo koronateasta juohke čihččet beaivve ja duođaštus bargoaddis.

Ellen Ravna
Ellen Ravna johtá beaivválaččat barggus Norgga bealde. Govva: Priváhtagovva

Ohcejohkalaš Ellen Ravna orru Ohcejoga Niemeläs. Beaivválaččat son bargá oahpaheaddjin Deanu sámeskuvllas Norgga bealde. Bargui jođedettiin son šaddá rasttildit Suoma ja Norgga rájá.

Ođđa rádjenjuolggadusaid mielde Suomas Norgii johtin ii leat vejolaš eará go barggu oktavuođas dahje orrunsivaid geažil.

– Dathan spiehkasta midjiide, geat bargat Dáža bealde. Mii oažžut mannat Dážii ja ii leat liikká dat karantena, muhto dalle galgá leat duođaštus fárus ahte galgá bargui, muitala Ravna.

Norgga ráđđehus gáibida, ahte Suomas dahje Ruoŧas Norgii bargui boahtti olbmot testejit iežaset juohke čihččet beaivve. Dalle ii dárbbaš eallit errema lágan dilis friddjaáiggis.

– Dan koronateastta ferte Norgga bealde váldit, muitala Ravna.

Ravna mielas ii leat vuogas go rádjeguovllu olbmot eai beasa šat friddja johtit Norggas. Son lea maiddái mielde searvedoaimmain ovdamearkka dihte Sámi Siida -searvvis. Mannan vahkus Sámi Siida sáddii cealkámuša Norgga ja Suoma eiseválddiide, mas searvi gáibidii Norgga ráji rahpama Deanuleagi guovllu ássiide.

– Mii leat nu hárjánan johtit dáppe. Dáppe lea várra dat rádjá, gos buot eanemus olbmot johtet ja lea eanemus oktavuohta Norgga ja Suoma gaskkas, čilge Ravna.

– Ferte beare dan dohkkehit, muhto ii leat dieđusge nu somá go álo galgá bisánit ja čájehit ahte gii don leat. Mun goittotge beasan rastá. Máŋgasathan eai beasa rájá rastá, dadjá Ravna.

Ellen Ravna johtá beaivválaččat Ohcejogas Detnui Norgga beallái bargui. Norgga ođđa rádjenjuolggadusaid mielde Norgii ii beasa johtit šat dábálaččat, muhto johtimii gáibiduvvo barggu oktavuohta dahje orrunsadji Norggas. Ellen Ravna muitala, mo ráji rasttildeapmi váikkuha su árgabeaivái. Jietna: Jouni Aikio / Yle

Gáregasnjárgalaš Máret-Sofe Harjunen johtá barggus Kárášjogas. Dál son lea fitnamin koronateasttas ovdal manná bargui. Son imaštallá manne rádjebargit galget fitnat koronateasttas.

– Na Roavvenjárggas lea, muhto leago min duođaid dárbu fitnat dás rájá alde teasttas, go iihan dáppe leat korona. Ii leat somás teasta maid lean gullan, muitala Harjunen.

Máret-Sofe Harjunen ii loga leat balus, muhto teastta ferte váldit go nu gáibiduvvo. Son ii goittotge dárbbaš ordnet teastta ieš.

– Bargoaddi lea ordnen áiggi ja buot, ja vahku geažes seamma láhkai.

– Dat manai bures, muhto dat ii leat nu somás teasta gal, dadjá Harjunen.

Máret-Sofe Harjunen johtá Gáregasnjárggas Kárášjohkii bargui. Dál son lea mannamin koronatestii, go Norgga ráđđehus gáibida, ahte rádjebargit galget testehit iežaset juohke čihččet beaivve. Jietna: Joni Saijets / NRK Sápmi

Varrasamosat: Sápmi

Váldoođđasat

Varrasamosat

Muualla Yle.fi:ssä