Sápmi |

Guldal jiena: Rievssatbivdduin bargi fitnodatdoalliin guovttelágan dovddut – kundarat buktet dietnasa, muhto leatgo rievssahat doarvái olu?

Rievssatnálli lea unnon ja unnán leat bivditge. Guldal ságastallama Ásllaga Á-Studios.

Samuli Näkkälä.
Samuli Näkkälä lohká, ahte lottit eai leat dán jagi seamma olu go ovdal. Govva: Johtti Sápmelaččat ry.

Meahciráđđehus lea juo guhká vuovdán Sápmái rievssatbivdolobiid olggobeale olbmuide. Rievssatbivdu lea áidna dáin sámi árbevirolaš bivdovuogádagain, man lea ain vejolaš čađahit árbevirolaš vuogi mielde nu, ahte ii rihkko lága.

Lihkká leat rievssatbivdit unnon jagis jahkái, muhto rievssatnálli lea maid unnon. Rievssatbivdu lea baicce šaddan dienasin muhtin sámiide, geat fállet bálvalusaid olggobeal bivdiide. Dat bohciidahttá fitnodatdoallis máŋggalágán dovdduid: sáhka lea dietnasis, muhto lihkká lea fuolla rievssatnális.

Lobit bohtet vuovdimassii geasset ja ovdamearkka dihte Ohcejoga guovllu lobit manne dalánaga. Nuba buohkat háliideaddjit eai ožžon lobiid dán bivdojahkái, dasgo lassebivdolobitge eai boahtán vuovdimassii dien guovllus ollenge. Maid lassebivdolobit leamaš bivnnuhat.

Buot lassebivdolobiin leat vuovdán aŋkke Váhčira, Gápmasa, Bátneduoddara, Guhttura, Čaarmâuáivááh, Giehtaruohttasa, Heahttá-Gárasavvon, Neakkela ja Muoná guovllus.

Seammás, go rievssahat leat geahppánan, lea Meahciráđđehus goittotge lasihan bivdolobiid davás. Ovddit jagiin heajumus jagige lea stáhta vuovdán lobiid olgobáikegoddelaččaide, vaikko báikkálaččat ieža eai bivdán lottiid.

Lottit eai nu olu, go ovdal – kundarat goit duđavaččat

Samuli Näkkälä Näkkälän eräpalvelut -fitnodagas jurddaša, ahte livčče buoret juo rievdadit bivddu nu, ahte beaivvis ovtta lobis livčče lohpi bivdit guokte rievssaha dálá golmma sajis. Son lea fuomášan, ahte lottit eai leat dán jagi seamma olu go ovdal.

Riekko kesäpuvussa
Olgobáikegotti olbmot leat beroštuvvan loddetuvrrain davvin. Govva: Yle / Risto Salovaara

– Mu mielas lottiid lohku lea unnit go ovddit guokte dahje golbma jagi áigge, muhto gal juohke beaivve leat rievssahat vuhtton. Ii nu buorre jahki leat dál, muhto áibbas nohkka. Min kundarat leat duđavaččat, jus goddet ovtta dahje guokte rievssaha beaivái, lohká Näkkälä.

Dološ vuogádat, ahte báikkálaš fitnodatdoalli beassá vuovdit lobiid, livččii Näkkälä mielas buoret. Ná lobit eai mannan duššás dahje eai vuovdán badjelmearálaš lobiid. Go lobit leat ovddalgihtii vuvdon ja bivdobeaivve deaiváge heajos dálki, soaitá leat, ahte olmmoš ii geavatge lobi, man lea oastán.

Samuli Näkkälä Ásllaga Á-studios Jietna: Ásllaga Á-studio

Ohcejoga jahki fuotni, eai lasselobit

Rievssahiid mearri lea Ohcejogas measta beali unnit, go diibmá. Ohcejogas ja Eanodagas rievssahiid mearri lea sullii gaskamearalaš. Dát dieđut bohtet ovdán luondduriggodatguovddáš Luke ja Meahciráđđehusa rehkenastimiin.

Jarmo Helander
Jarmo Helander mielde stuorámus oassi su vejolaš kundariin bázii dál lobiid haga. Govva: Outi Paadar / Yle

Jarmo Helanderii Ohcejoga bealde rievssatbivdoáigi lea dehálaš dienas, muhto lohká leahkit guovttelágan dovdduin, go rievssahat eai leat dál nu ollu garra giđa maŋŋá. Ohcejohkii eai dán jagi vuvdon lasselobit, nuba stuorámus oassi Helander vejolaš kundariin bázii lobiid haga.

Helander muitala, ahte 20 proseantta su jagi sisaboađus boahtá guovtti mánu loddebivddus.

Jietna: Ásllaga Á-studio

Olles Ásllaga Á-studio -sáddaga sáhttá guldalit dáppe. Ásllaga Á-studio juohke vuossárgga Yle Sámi radios diibmu 14.33–16.00.

Varrasamosat: Sápmi

Váldoođđasat

Varrasamosat

Muualla Yle.fi:ssä