Sápmi |

Guldal jiena: Sámebárdni johtá beakkán Apocalyptica joavkku fárus festiválain birra Suoma

Tuomo Laiti gárttai 16 mánotbaji bargat eará suorggi bargguid, muhto dál go koronaráddjehusaid leat ložžen, de son lea beassan fas johtit festiválain.

Tuomo Laiti
Tuomo Laiti mielas lea somá fas bargat dáhpáhussuorggi bargguid. Govva: Tuomo Laiti

Guldal maid Tuomo Laiti muitala su barggus. Jietna: Sáárá Seipiharju / Yle
Ohcejohkalaš Tuomo Laiti vástida telefovdnii linnjábiillas. Son lea Mäntsälä buohta jođus Kokkolai konsertii. Dán geasi son johtá beakkán musihkkajoavkku Apocalyptica fárus festiválain birra Suoma gitta borgemánu loahpa rádjái.

– Dál lea juo nubbi vahkuloahppa go beassat johtit festiválain. Apocalyptica joavkku čuojaheaddjit leat gal somás albmát, muitala Laiti.

Laiti barggai ovdal koronapandemiija dáhpáhussuorggis earret eará čuovgateknihkain. Koronadili geažil son gárttai 16 mánotbaji bargat áibba eará bargguid, son čilge.

Koronadili ja koronaráddjehusat čuhce garrasit kultuvra- ja dáhpáhussuorggi bargiide. Dál goittotge Suomas leat ložžen koronaráddjehusaid nu, ahte lea vejolaš ordnet ovdamearkan festiválaid.

Ložžemiid ánssus maiddái Laiti lea beassan fas joatkit iežas suorggi bargguid. Son ordne festiválain čuovggaid ja lávddiid.

– Orru hui somá leat fas iežan bargguin, son illuda.

– Várra buoremus hommá lea beassat ordnet lávddi. Ja go álgá dat konsearta ja olbmot besset návddašit livemusihkas guhkes áigái ja mis buohkain lea somá.

Laiti lohká, ahte olbmot gal viššalit geavahit festiválain njálbmenjunnesujiid ja festiválalágideaddjit čuvvot dárkilit ávžžuhusaid ja njuolggadusaid.

Koronaáigi goittotge su mielas vel vuhtto festiválain dan láhkai, ahte olbmot eai láhtte vel nu friddja, dego ovdal korona.

Lasi Beaivvi ságaid ja Yle Ođđasiid Sámis sáhtát guldalit Yle Areenas.

Varrasamosat: Sápmi

Váldoođđasat

Varrasamosat

Muualla Yle.fi:ssä