Sápmi |

Guldal jiena: Sámediggi atná Muttošjávrri boaresvuovddi suodjalanášši buorre ovdamearkan eará oktasašmehciide

Sámedikki ságadoalli Tuomas Aslak Juuso dadjá, ahte Sámediggi lea juo guhkkit áigge sávvan, ahte maiddái davimus Sámis livččii vejolaš suodjalit boaresvuvddiid ja oažžut dain seammás maid buhtadusa.

Tuomas Aslak Juuso
Sámedikki ságadoalli Tuomas Aslak Juuso sávvá, ahte boares vuvddiid suodjaleapmái gávdnošii ruhtadeapmi maiddái boahttevuođas. Govva: Vesa Toppari / Yle

Sámedikki ságadoalli Tuomas Aslak Juuso lea duhtavaš Ohcejoga boazodáluid oktasašmeahci mearrádussii suodjalit 700 hektára boares vuovddi Anára gieldda davvioasis, Muttošjávri bálgosis.

Muttošjávrri bálggus ja Ohcejoga boazodáluid oktasašmeahcci leat leamaš oktavuođas Sámediggái ja bivdán Sámedikki doarjut áššis ja váikkuhit dan ovdáneapmái. Juuso mielde Sámediggi lea aktiivvalaččat ovddidan ášši birasministeriija bokte.

– Sávvamis dat rahpá ja addá vejolašvuođa eará oktasašmehciid oasusgottiide jurddašit suodjaleami ja goittotge oažžut buhtadusa mehciid suodjaleamis. Dat lea hui buorre ovdamearka ja sávan, ahte dat rahpá jurddašeami, ahte dat lea vejolaš, lohká Juuso.

Sámediggi sávvan juo guhká suodjalanprográmma davimus Sápmái

Ohcejoga boazodáluid oktasašmeahcci áigu suodjalit birrasiid meahci birasministeriija boaresvuvddiid suodjalanfidnu bokte, mas eananoamastus bissu eananeaiggádis, muhto stáhta máksá muoraid árvvu eaiggádii.

Vuovddi suodjaleamis Ohcejoga boazodáluid oktasašmeahcci lea oččodeame 892 000 euro sturrosaš buhtadusa.

Sámediggi lea juo guhkkit áigge sávvan, ahte boaresvuvddiid METSO-suodjalanprográmma guoskkašii maiddái davimus Sámi. Diibmá Suoma golbma davimus EJB-guovddáža goit ožžo birasministeriijas 20 miljovnna euro lassimearreruđa, mainna lea dál vejolaš suodjalit boaresvuvddiid.

– Lassimearreruhta lea dahkan vejolažžan sámeguovllus seammá sullasaš priváhtavuvddiid suodjaleami, maid METSO-prográmma Mátta-Suoma priváhtavuvddiin lea bargan juo guhká. Dát lea buorre álgu, muhto sávvamis Davvi-Suoma boares vuvddiid suodjaleapmái gávdno ruhtadeapmi maiddái boahttevuođas, dadjá Tuomas Aslak Juuso.

Sámedikki ságadoalli Tuomas Aslak Juuso atná Muttošjávrri boaresvuovddi suodjalanášši buorre ovdamearkan eará oktasašmehciide. Jietna: Anni-Saara Paltto / Yle

Yle Ođđasiid Sámis ja Beaivvi ságaid sáhtát maid guldalit Yle Areenas.

Varrasamosat: Sápmi

Váldoođđasat

Varrasamosat

Muualla Yle.fi:ssä