Sápmi |

Guldal jiena: Sámedikki kulturdoarjagat ohcanláhkái – ruhta dárkkuhuvvon sámegielat doaimmaid ovddideapmái

Doarjagiid sáhttet oažžut ovttaskas sápmelaččat ja sámesearvvit.

Saamelaiskäräjien virkaatekevä kulttuurisihteeri Riitta Orti-Berg
Sámedikki kulturčálli Riitta Orti-Berg ávžžuha ohcat kulturdoarjaga ovdal golggotmánu loahpa. Govva: Linnea Rasmus / Yle

Sámediggi almmuha ohcanláhkai doarjagiid, mat leat dárkkuhuvvon sámegielat kultuvrra ovddideapmái ja sámeservviid doaibmamii.

Sámedikki kulturlávdegotti čálli Riitta Orti-Berg muitala, ahte sámedikki kulturlávdegoddi ii velá dán muttus dieđe, man ollu oahpahus- ja kulturministeriija mieđiha mearreruđa kulturdoarjagiid várás.

Lávdegoddi lea goit ohcan ministeriijas sámekultuvrra ovddideapmái 250 000 euro.

– Ovddit jagiid ruhta leat boahtán 191 000 euro. Mannán jagi fidniimet velá dán jagi várás badjelmearálaš ruhtadeami, man galggai geavahit namalassii dán jagi bealde, dadjá Orti-Berg.

Kulturdoarjagiid ohcamis eai leat rádjjehusat dahje ovdamearkka dihte sierra temát, ahte maid várás olbmot sáhttet ohcat ruđa. Doarjja juhkkojuvvo baicce aitosaš kulturdoarjjan, sámeservviid doaibmandoarjjan ja almmustahttindoarjjan.

Dán jagi ohcamis mieđihuvvon ruđaide lea guovtti jagi geavahanáigi nappo kulturdoarjaga sáhttá geavahit jagi 2021 ja 2022 áigge.

– Ferten rábmot, ahte sápmelaččain leamaš buorit ohcamušat, iige leat dárbbašan smiehttat gánnihago dákkár áššiide juohkit ruđa.

Doarjja mieđihuvvo dušše sámeservviide

Ohcanrávvagiid mielde aitosaš kulturdoarjagiid sáhttet mieđihit juogo prošeavttadoarjjan dahje bargostipeanddaid hámis. Doarjagiid mieđihit eare eará girjjálašvuođa, govvadáidaga, musihka, teáhtera, duoji, multimedia- dahje filbmafidnuide. Doarjagiid addet maiddái kulturdáhpáhusaid, mátkeveahkkeruđaid, valástallandoarjagiid ja eará kulturdoarjagiid várás.

Sámeservviide bealisteaset mieđihit doaibmandoarjagiid. Sámesearvin rehkenastet dán oktavuođas sámeservviid, mat ulbmiliideaset mielde geahččalit ovddidit ja sihkkarastit sápmelaččaid sajádaga ja kultuvrra. Searvvi stivrra ságajođiheaddji dahje várreságajođiheaddji, stivrra eanetlohku sihke lahtuid eanetlohku galget maiddái leat sápmelaččat.

Almmustahttindoarjaga fas mieđihit earet eará sámegielat aviissaid, girjjiid, cd-skearruid, audiovisuálalaš ja multimediabuktagiid sihke ođđamediabuktagiid almmustahttimii.

Sámedikki kulturdoarjagiid eai mieđit almmolaš hálddahusa orgánaidda nugo stáhta, gielddaid, gieldaovttastumiid, fitnodatlágádusaid ja searvegottiid virgeoapmahaččaide ja doaibmaorgánaidda. Kulturdoarjagiid eai maid mieđit oahppamateriála buvttadeapmái.

Dorjojuvvon fidnut galget vástidit sápmelaččaid árvomáilmmi sihke doarjut sámekultuvrra seailuma ja ovdáneami ja dat galgá šaddat sámekultuvrra ávkin.

Doarjjaohcamušaid sáhttá sáddet sámediggái maŋimustá golggotmánu 31. beaivvi rádjái.

Anja Kaarret jearahallá sámedikki kulturčálli Riitta Orti-Berg. Jietna: Yle Areena

1.10.2020 dii. 17.05 lasihuvvon Riitta Orti-Berg jearahallamii liŋka ja bajilčállágii lasihuvvon diehtu jietnaliŋkkas.

Varrasamosat: Sápmi

Váldoođđasat

Varrasamosat

Muualla Yle.fi:ssä