Sápmi |

Guldal jiena: Sámegielat spealloberošteaddjit sáhttet ohcalit dienasbargui speallobajásgeassin

Speallobajásgeassit galget láidestit mánáid ja nuoraid speallanrieggáin neahtas.

Kati Eriksen
Kati Eriksen muitala, ahte nuorat besset speallama bokte nannet maiddái iežaset sámegiel dáiddu. Govva: Anneli Lappalainen / Yle

Sámegielat mánát ja nuorat gos beare sáhttet farga oassálastit sámegielat speallanrieggáide neahta bokte. Dál speallanrieggáid várás ohcet sámegielat speallobajásgeassiid.

Deanuleagis sámástit -prošeakta álggaha dán giđa sámegielat speallanrieggáid neahtas ovttasbarggus School of Gaming -spealloskuvllain. Prošeakta ja speallanskuvla skuvlejit ja bálkáhit sámegielat speallobajásgeassiid. Sin bargun lea láidestit mánáid ja nuoraid speallanrieggáin.

Ulbmil dán barggus lea nannet mánáid ja nuoraid sámegiel geavaheami ja spealločehppodaga. Bargui maiddái ordnejuvvo vuos skuvlen, muitala prošeaktahoavda Kati Eriksen.

Eriksen árvala, ahte dainna doaimmain sii bastet olahit buot speallamis beroštuvvan sámegielat nuoraid gos ihkenassii sii ássetge.

– Mii háliidit velá lasi sámegielat speallobajásgessiid, go mii jáhkkit ahte dát lea dakkár doaibma, mii eandalitge dál koronaáigge lea hui áigeguovdil ja jáhkkimis báhcá vel koronaáiggi maŋŋáge.

Ohcanáigi bargui nohká dán vahku sotnabeaivve, 4.4. Eriksen deattuha, ahte ohcci sáhttá ássat gos beare, dasgo barggu sáhttá bargat ollásit gáiddusin. Ohcanrávvagiid gávnnat dáppe.

Guldal eanet áššis dás. Jietna: Jouni Aikio / Yle

Fidnu ohcá maid 13–16-jahkásaš nuoraid guovtte vahku geassebargui. Nuorat besset filbmet vuorrasut olbmuid, go sii muitalit earret eará báikenamaid birra. Ohcanáigi dasa nohká cuoŋománu 18. beaivve. Lassedieđuid sáhttá lohkat Deanuleagis sámástit -prošeavtta neahttasiiddus.

Yle Ođđasiid Sámis ja Beaivvi ságaid sáhtát maid guldalit Yle Areenas.

Varrasamosat: Sápmi

Váldoođđasat

Varrasamosat

Muualla Yle.fi:ssä