Sápmi |

Guldal jiena: Sámenuorat leat fuolas das, ahte sámeguovllu geavahit dálkkádatrievdama bissehandoaimmaide

Sámenuorat gáibidit doaimmaid dálkkádatrievdama goahcamii, muhto dat eai oaččo geahnohuhttit sámekultuvrra ja -ealáhusaid.

Anni-Sofia Niittyvuopio
Anni-Sofia Niittyvuopio lea ovttas badjel 80 sámenuorain miehtá Sámi hábmen resolušuvnna, mii čalmmustahttá fuola Sámi luonddu dilis ja boahttevuođas ja čohkke evttohusaid doaibmabidjun. Govva: Elli-Marja Hetta

Suoma, Norgga ja Ruoŧa sámenuorat gáibidit doaimmaid dálkkádatrievdama goahcamii. Sámenuorat leat fuolas das, ahte makkár boahttevuođas šaddá ja mo sámekultuvra ja árbevirolaš ealáhusat cevzet, go dálkkádat rievdá. Dát boahtá ovdan sámenuoraid almmustahttin resolušuvnnas, man sii leat hábmen davviriikkalaš sámenuoraid konferánssa oktavuođas.

Sámenuorat goittotge oaivvildit, ahte dálkkádatrievdama goahcandoaimmat eai oaččo geahnohuhttit sápmelaččaid ealáhusaid ja kultuvrra.

Suoma Sámedikki nuoraidráđi ságadoalli Anni-Sofia Niittyvuopio mielde sápmelaččat leat massán eatnamiid eará eanageavaheapmái ja infrastruktuvrii, muhto dál daid seamma eatnamiid hálidit nu gohčoduvvon ruoná kolonialismma geavahussii dálkkádatrievdama eastadeami dihtii.

– Mii eat dohkket dan, ahte min eatnamat geavahuvvojit šat dálkkádatrievdama bissehandoaimmaide, lohká Niittyvuopio.

Niittyvuopio mielde lea maid dehálaš, ahte sámenuoraid dieđut ja dáiddut adnojuvvoše árvvus ja sámenuoraid válddášedje fárrui áššedovdin iešguđege ráđđádallamiin ja bargojoavkkuin sihke riikkadásis ja maiddái riikkaidgaskasaš oktavuođain.

Dasa lassin sámenuorat leat resolušuvnnastis lokten sosiálalaš ja kultuvrralaš áššiid, dego gielageavaheami, sámiid vásihan rasismma ja dearvvašvuođabálvalusaid.

Resolušuvdna gávdno anáraš-, nuortalaš-, ja davvisámegillii, suomagillii ja eaŋgasgillii Sámedikki neahttasiiddus..

Anni-Sofia Niittyvuopio lei mielde vuossáriđida Buorre Iđit Sápmi -sáddagis. Guldal su jearahallama dás. Jietna: Inger-Elle Suoninen / Yle

Beaivvi ságaid ja Yle Ođđasiid Sámis sáhtát maid guldalit Yle Areenas.

Varrasamosat: Sápmi

Váldoođđasat

Varrasamosat

Muualla Yle.fi:ssä