Sápmi |

Guldal jiena: Sámi bálgosat váldet beali Giehtaruohttasa guovlovárremii: “Dilli ii leat dohkálaš”

Tiina Sanila-Aikio Sámi bálgosat -searvvis muitala, ahte boazodoalliin lea oktasaš fuolla ruvkedoaimmaid viiddideames Sápmái.

Asko Länsman, Tuomas Semenoff, Hannu Ranta, Tarmo Ljetoff, Tiina Sanila-Aikio, Jarmo Haataja, Juha Tornensis, Petri Hänninen ja Osmo Seurujärvi
Sámi bálgosat -searvvi stivra čoahkkanii moadde vahku dassái Gilbbesjávrris. Govas stivrralahtut Asko Länsman, Tuomas Semenoff, Hannu Ranta, Tarmo Ljetoff, Tiina Sanila-Aikio, Jarmo Haataja, Juha Tornensis, Petri Hänninen ja Osmo Seurujärvi. Govva: Sámi bálgosat rs / Saamelaispaliskunnat ry

Eará sámebálgosat dorjot Giehtaruohttasa bálgosa ruvkedoaimmaid vuostá.

Tukes lea cuoŋománus mieđihan málbmaohcanfitnodat Akkerman Finland Oy:ii guovlovárrema Giehtaruohttasa Jiehtáčearu guvlui. Fitnodat áigu bargat earret eará eanandutkamušaid 245 njealjehaskilomehtera sturrosaš guovllus ja ohcat málbmaohcanlobi ovdal várrenáiggi nohkama.

Várrenguovlu gokčá sullii 70 proseantta Giehtaruohttasa bálgosa Ergona siidda geasse- ja čakčaguođohanguovllus. Bálggus ii dohkket guovlovárrema.

Sámi bálgosat -searvvi stivrra mielas dilli ii leat dohkálaš Giehtaruohttasa bálgosii ja dan siiddaide. Searvvi ságadoalli Tiina Sanila-Aikio muitala, ahte boazodoalliin lea oktasaš fuolla das, ahte ruvkedoaimma figget viiddidit olles boazodoalloguvlui.

– Dakkár doaibmavuohki ii leat dohkálaš, mii dál lea ruvke- ja golleroggandoaimmain, mii boahtá doppe ruvkelágas. Sámi bálgosat leat miehtá Sámi guovllu Giehtaruohttasa bálgosa duohken.

Tiina Sanila-Aikio oaivvilda, ahte ruvkedoaimma lea geavadis veadjemeahttun heivehit oktii boazodoaluin ja eará ealáhusaiguin, mat ellet buhtes luonddus.

– Lean erenoamáš fuolas das, mo juo ieš várrenmuddu váikkuha negatiivvalaččat min buresveadjimii ja jáhkkui ealáhussamet ja kultuvramet boahtteáiggis.

Guldal dás Sámi bálgosat -searvvi ságadoalli Tiina Sanila-Aikio jearahallama. Son muitala earet eará das, mo Sámi bálgosat miehtá sámeguovllu leat Giehtaruohttasa bálgosa duohken. Jietna: Yle Areena.

Stivrra ođđa várreságadoalli, Neakkela bálgosa boazoisit Hannu Ranta muitala searvvi dieđáhusas iežas leat fuolas das, ahte ruvkeindustriija lobben lassána Sámis.

– Boazodoallu duolmmahallá ruvkeindustriijai ovdamearkka dihtii resurssaid beales, dadjá Ranta.

Sámi bálgosat -searvi áigu leat aktiivvalaččat mielde ruvkelága ođasmahttimis ja doarjut Giehtaruohttasa bálgosa.

Searvvis leat mielde 11 sámeguovllu bálgosa

Sámi bálgosiid searvvi stivra čoahkkanii moadde vahku dassái Gilbbesjávrris. Suomas leat oktiibuot 13 sámebálgosa. Dain 11 gullet searvái, mii vuođđuduvvui jagis 2018.

Stivrii gullet ságadoalli Tiina Sanila-Aikio ja várreságadoalli Hannu Ranta lassin Jarmo Haataja Bátneduoddara bálgosis, Asko Länsman Gálddoaivvi bálgosis, Juha Tornensis Giehtaruohttasa bálgosis, Osmo Seurujärvi Muttošjávrri bálgosis, Tarmo Ljetoff Muotkeduoddara bálgosis, Wille Feodoroff Njávdáma bálgosis, Petri Hänninen Báhčaveaji bálgosis, Ari-Heikki Aikio Báišduoddara bálgosis, Nils-Heikki Näkkäläjärvi Sállevári bálgosis ja Tuomas Semenoff Váhčira bálgosis.

Searvvi ulbmil lea sámebálgosiid boazodoalu ovddideapmi ja ovdduid gohcin. Dat čuovvu suorggi ekonomalaš ovdáneami ja láhkaásaheami ja dahká daidda laktáseaddji álgagiid, evttohusaid ja cealkámušaid.

Varrasamosat: Sápmi

Váldoođđasat

Varrasamosat

Muualla Yle.fi:ssä