Sápmi |

Guldal jiena: Sámi Grand Prix -lávlunoasi vuoitit Hildá Länsman ja Lávre Johan Eira illudeaba lihkostuvvan ovttasbarggus

Jođi lea buoret go oru -dajáldat ovttastahttui luđiin ja dainnaláhkái Hildá Länsman ja Lávre Johan Eira vuittiiga dán jagaš Sámi Grand Prix -lávlungilvvu.

Sámi musihkkafestivála, Hildá Länsman, Lávre Johan Eira
Lávre Johan Eira ja Hildá Länsman leigga ilus ja duđavaččat, go vuittiiga. Govva: Sámi musihkkafestivála

Movttegis SGP-vuoittit illudeigga lihkostuvvan ovttasbargguin. Jietna: Kolbjørn Norvang / NRK

Ohcejohkalaš Hildá Länsman ja guovdageaidnolaš Lávre Johan Eira vuittiiga dán jagaš Sámi Grand Prix -gilvvu lávlunoasi. Sudno bihtá namma lea Jođi ja bihttá geardduhage boares ja bivnnut dajáldaga: jođi lea buoret go oru.

– Áibbas somá, gelddolaš, giitevaš dovdu, illu, mokta! huikáša Hildá Länsman aiddo maŋŋel gilvvu.

Nie oaivvilda maid Lávre Johan Eira, guhte lei juo vehá balus ovdal gulai gilvvu bohtosiid.

Hildá Länsman jearai Eira bargat ovttasbarggus dán bihtá, go lei su deaivvadan nubbi dilálašvuođas.

– Munnje bođii jurddan ráhkadit Sámi Grand Prixai bihtá maŋŋel go ledjen deaivvan Lávre Johana Sámi music awards -doaluin. Sus lei nu buorre energiija, de bođii mokta ráhkadit musihka, go ledje nie fiinna olbmot doaluin, Länsman muitáša.

Nie álggii ovttasbargu, mii doalvvui sudno Sámi Grand Prix vuitui.

– Moai leimme oainnát goappásagat nominerejuvvon, muhto ean vuoitán, muhto das riegádii hui somás ovttasbargu goittotge, Eira joatká.

Länsman lea oktii ovdal oassálastan Sámi Grand Prix -gilvui. Son lei mielde jagis 2017 Gájanas-joavkkuin ja sii bohte dalle nubbin.

Sámi Grand Prix -gilvvu juoiganoasi vuittii Máhtte Ánte J. Sara eamidis luđiin.

Yle Ođđasiid Sámis ja Beaivvi ságaid sáhtát maid guldalit Yle Areenas.

Varrasamosat: Sápmi

Váldoođđasat

Varrasamosat

Muualla Yle.fi:ssä