Sápmi |

Guldal jiena: Juridihkkadoavttir Juha Guttorm duđavaš ođđa sámediggeláhkaevttohussii – "Rivttes vuođu ala dahkkon evttohus"

Sámi juridihkkadoavttir Juha Guttorm oaidná, ahte sámediggeláhkadoaibmagoddi lea váldán ođđa evttohusastis álgoálbmogiid rivttiid rukses láigin. Stuorra gažaldagat leat ain válgalogahallama guoski paragráfat. Guttorm oaidná, ahte láhkaevttohus lea goit mannan buoret guvlui ovddežis, muhto smiehtadanmunni das ain lea.

Juha Guttorm, SámiSoster
Juridihkkadoavttir Juha Guttorm nákkáhalai sámiid iešmearrideamis jagis 2018. Govva: Linda Tammela / Yle

Sámi juridihkkadoavttir Juha Guttorm lea jođánit geahčastan čađa ođđa evttohusa sámediggelágas. Ođđa sámediggelága nuppástusevttohus almmustahttojuvvui maŋŋebárgga.

Guttorm nákkáhalai sámiid iešmearrideamis jagis 2018 ja lea dál fuomášan buori ovdáneami sámediggelága nuppástusa válmmaštalli doaibmagotti evttohusas.

– Lean duđavaš dan ektui, ahte doaibmagotti evttohus lea rivttes vuođu ala láhččojuvvon. Oaivvildan dan, ahte das lea váldojuvvon vuhtii álgoálbmotvuoigatvuođaid varraseamos ovdáneapmi. Álgoálbmotrievttit leat dás guovddážis, nugo rukses láigi dain doaibmagotti evttohusain, smiehtada Guttorm.

Guttorm čilge, ahte varrasamos ovdáneapmi dárkkuha, ahte iešmearridanvuoigatvuohta lea dálá áigge álgoálbmotvuoigatvuođaid guovddášvuoigatvuohta.

– Dat vuhtto maid doaibmagotti evttohusain, oaivvilda Guttorm.

Guldal dás juridihkkadoavttir Juha Guttorma jurdagat ođđa sámediggeláhkaevttohusas. Jietna: Sara Wesslin / Yle

Sápmelašmeroštallama sadjái vuoigatvuohta beassat válgalogahallamii

Okta nu gohčoduvvon báhkka buđet lea ain gažaldat das, geat bohtet dohkkehuvvot sámediggeválggaid jienastanlohkui. Guttorm lokte ovdan nuppástusa, man mielde ođđa lágas eai šat hálaše sápmelašmeroštallamis, baicce das, geas lea vuoigatvuohta beassat válgalogahallamii.

– Ádden dán duogáža. Riikkaidgaskasaš vuoigatvuođashan ii leat meroštallon, mii lea álgoálbmot dahje geat gullet álgoálbmogii. Dat lahttuvuođa meroštallan maiddái váilu. Dien dáfus lea dieđusge logalaš, ahte dien guvlui maiddái evttohus manná, dadjá Guttorm.

Dál evttohus vuolgá cealkinláhkai. Ulbmilin lea, ahte riikabeaivvit gieđahallá láhkaevttohusa boahtte skábmamánus.

Juridihkkadoavttir Juha Guttorm guorahalláge dál, ahte maid evttohus válgavuoigatvuođa meroštallamis boahtá mearkkašit sámiide boahtteáiggis. Láhkaevttohusas váilu ollásit meroštallan sápmelašvuođas láhkadásis. Dan ferte Guttorm mielas ain eanet smiehttat.

– Sámediggelága vuoigatvuođathan leat dorvvastuvvon kollektiivvalaččat álbmogii, ii ovttaskas sápmelaččaide. Ahte maid dien oktavuođas dasto boahttevuođas boađášii mearkkašit. Dán ferte smiehttat vehá dárkilabbot, jurddaša Guttorm.

Yle Ođđasiid Sámis ja Beaivvi ságaid sáhtát maid guldalit Yle Areenas.

Varrasamosat: Sápmi

Váldoođđasat

Varrasamosat

Muualla Yle.fi:ssä