Sápmi |

Guldal jiena: Sámiráđi ja SSN diehtojuohkinprošeakta lea oktan finalistan Regiostars 2021 -gilvvus

Suoma sámenuoraid ságadoalli Enni Similä illuda, go sin prošeakta “Filling the EU-Sápmi knowledge gaps” lea finalistan EU-gaskasaš Regiostars gilvvus. Similä mielas dat čájeha, ahte EU ja sámiid gaskasaš diehtojuohkin lea dehálaš ja dárbbašlaš.

Enni Similä
Suoma sámenuoraid ságadoalli Enni Similä muitala, ahte sii leat hui rámis ja ilus go besse finálii vuoiggalaš Eurohpá -kategoriijas. Govva: Kirsti Helena Länsman / Yle

Guldal maid Enni Similä muitala prošeavttas ja gilvvus. Jietna: Jouni Aikio / Yle

Sámiráđi ja Suoma Sámenuoraid diehtojuohkin prošeakta “Filling the EU-Sápmi knowledge gaps” lea finalistan EU-gaskasaš Regiostars 2021 gilvvus.

– Dathan gal dieđusge čájeha, ahte mii leat bargame buorre ja dehálaš barggu ja mii leat hui rámis ja giitevaččat das, ahte leat beassan finála rádjái, illuda Suoma sámenuoraid ságadoalli Enni Similä.

Regiostars gilvu lea jahkásaš gilvu EU ruhtadan fitnuide ja dainna loktejit prošeavttaid, mat leat čájehan buriid guovllu ovddidan geavadagaid ja mat leat innovatiivvalaččat, muitala Similä. Sii gilvvohallet vuoiggalaš Eurohpá -kategoriijas ja gii beare sáhttá jienastit sin prošeavtta gilvvu neahttasiiddus vaikko juohke beaivve.

“Filling the EU-Sápmi knowledge gaps” -prošeavtta ulbmilin lea hukset gelbbolašvuođa ja diehtovuođu sámiid ja EU gaskkas. Similä čilge, ahte dán prošeavttas leat njeallje iešguđege oassi. Vuosttaš oassi lea oahpahalliprográmma mii leage jo jođus, nubbi kurssaid lágideapmi ja goalmmát EU-Sápmi jurddabeassi, mas plánejit guhkitáigásaš plánaid ja strategiija EU ja sámiid oktavuhtii.

Maŋimuš oassi dán prošeavttas lea EU-Sápmi vahku mas sii áigot doalvut sámiid Brusselii ja doppe čalmmustahttit sámiid áššiid ja kultuvra.

Yle Ođđasiid Sámis ja Beaivvi ságaid sáhtát maid guldalit Yle Areenas.

Varrasamosat: Sápmi

Váldoođđasat

Varrasamosat

Muualla Yle.fi:ssä