Sápmi |

Guldal jiena: Sámiráđđi lea ásahan sámi kultur- ja dáiddasuorggi jurddabeasi – áigumuš lea čálmmustahttit sámi kultursuorggi dárbbuid ja vejolašvuođaid

Jurddabeassi galgá doaibmat jagi ja dat čoahkkimastá digitálalaččat koronadili dihtii.

Christina Hætta
Min mielas lea dehálaš ásahit arenaid, gos sámi kultursuorgi beassá digáštallat ja hábmet ođđa jurdagiid ja evttohusaid politihkkalaš máilbmái, dadjá Sámiráđi kulturossodaga hoavda Christina Hætta. Govva: Sámiráđđi

Sámiráđđi lea bovden iešguđet sámi kulturbargiid ja dáiddáriid searvat jurddabeassái ja iežaset gelbbolašvuođa bokte hábmet ođđa jurdagiid ja evttohusaid doaibmabijuide sámi kultur- ja dáiddasuorgái logi jagi perspektiivvas.

Kultur- ja dáiddasuorggis miehtá máilmmi vásihit dál ovtta dain stuorámus hástalusain goassige koronadili dihtii, čuoččuhuvvo Sámiráđi dieđáhusas.

– Našunála dásis eiseváldit eai váldde vuhtii sámi kulturbargiid ja ásahusaid hástalusaid sin guorahallamiin ja sin heahteortnegiid bokte. Dan dihtii min mielas lea dehálaš ásahit arenaid, gos sámi kultursuorgi beassá digáštallat ja hábmet ođđa jurdagiid ja evttohusaid politihkkalaš máilbmái, dadjá Sámiráđi kulturossodaga hoavda Christina Hætta.

Áigumuš dáinna jurddábesiin lea čálmmustahttit sámi kultursuorggi dárbbuid ja vejolašvuođaid, ja buktit ođđa jurdagiid, doaimmaid ja čovdosiid sámi dáiddá- ja kulturmáilbmái logi jagi perspektiivvas.

Čoahkkimastet digitálalaččat

Jurddabeassi galgá doaibmat jagi ja vuosttaš čoahkkin jurddabeasis lei bearjadaga 11.9.2020. Koronadili dihtii jurddabeassi čoahkkana digitálalaččat, muitala Hætta.

– Dat lea dieđusge hástalussan. Mishan leat olu iešguđetlágan gielat, sámegielat ja maiddái skandináviija gielat ja ruoššagiella, muhto mii leat Sámiráđis dutkan hirbmadit makkár digitála lávdi heive ja leat dál geahččaladdamin ja šaddamin čeahpit ja čeahpit, dadjá Hætta.

Loahppaboađus lea raporta, mas ulbmilin lea nannet oktasaš sámi kulturpolitihka sihke sámi ja našunála dásis.

Jurddabeasis leat lahttun Maria Utsi, Lea Simma, Jenni Laiti, Pirita Näkkäläjärvi, Nils Johán Labba, Ánne Kirste Aikio, Oskar Östergren Njajta, Patricia Fjellgren, Siljá Somby, Ailu Valle, Ánddaris Rimpi, Dávvet Bruun-Solbakk, Ol Johán Gaup, Milana Sapelnikova, Ánne Lájlá Utsi, Niillas Somby, Sámiráđis Christina Hætta ja Anne Henriette Nilut.

Guldal Sámiráđi kulturossodaga hoavda Christina Hætta jearahallama dás. Jietna: Jouni Aikio / Yle

Varrasamosat: Sápmi

Váldoođđasat

Varrasamosat

Muualla Yle.fi:ssä