Sápmi |

Guldal jiena: Sámit geahččalit váikkuhit ođđa ruvkeláhkii – "Ruvkedoaibma ii heive oktii sámekultuvrrain"

Sámedikki ságadoalli Tuomas Aslak Juuso ja Giehtaruohttasa ruvkevuostálastiid aktiiva Minna Näkkäläjärvi muittuheaba, ahte ođđa ruvkelágas galgá váldit vuhtii árbevirolaš ealáhusaid.

Saamelaiskäräjien puheenjohtaja Tuomas Aslak Juuso
Sámedikki ságadoalli Tuomas Aslak Juuso vuordá, ahte ruvkeláhka sihkkarasttášii sápmelaččaid álgoálbmotrivttiid ollislaččat. Govva: Tuomas Hautaniemi / Yle

Suomas leat válmmaštallamin ruvkelága ođasmahttima.

Sámedikkis ruvkelága ođasmahttima gieđahalle gieskat maid dievasčoahkkima sáttaságastallamis. Sámediggi lea oktan čanusjoavkun ruvkelága ođasmahttin bargojoavkkus ja galgá vel leat hábmeme sáttaságastallama vuođul dan, maid ovddidit lága ođasmahttimis. Sámediggi atná ruvkelága ođasmahttima oktan dán čavčča dehálamos áššin.

Sámedikki ságadoalli Tuomas Aslak Juuso oaidná, ahte árbevirolaš ealáhusaiguin ruvket eai heive oktii.

– Sámeguvlui ja min árbevirolaš ealáhusaide ruvkedoaimmat eai riekta heive. Dat mo čázadagat ja buhtes luondu dárbbašuvvo, dat lea nana vuolggasadji, ahte ruvket eai livčče sámi ruovttuguvlui ollet, Juuso lohká.

Loga maid: Lappi riikkabeaiáirasat eai oalát gielddáše ruvkedoaimmaid sámeguovllus – deattuhit gielddaid mearridanválddi

Juuso: "Doaibma, mii eastada nuppi kultuvrra čađaheami, ii sáhte leat Suomas dohkálaš"

Sámedikki ságadoalli Tuomas Aslak Juuso mielde vuordámuš ruvkelága ektui livčče dat, ahte dat sihkkarasttášii sápmelaččaid vuoigatvuođaid álgoálbmogin ollislaččat.

Tuomas Aslak Juuso oaivvilda maiddái, ahte suodjalanguovlluid, dego Natura 2000 -guovlluid, berrešii ráfáidahttit ruvkedoaimmain. Son lea dan oaivilis, ahte ruvkedoaibma ii fal heive sámeguvlui.

– Dakkár doaibma mii heajuda dahje eastada nuppi kultuvrra čađaheami, ii sáhte leat Suomas dohkálaš. Dan dihte oainnán, ahte ruvkedoaibma ii čága oktii sámekultuvrrain, dadjá Juuso.

Bargo- ja ealáhusministeriija válmmaštallan hámus lea dál gulaskuddamis. Gulaskuddama maŋŋá hápmosii bargojuvvojit dárbbašlaš rievdadusat ja dat geigejuvvo ráđđehusa evttohussan riikkabeivviide juovlamánus 2020.

Sámedikki ságadoalli Tuomas Aslak Juuso muitala, mo Sámediggi ovdána cealkámušain ruvkelága ođasmahttimis. Son oaivvilda, ahte ruvkket eai gula Sápmái, eaige heive árbevirolaš boazodoaluin oktii. Jietna: Inger-Elle Suoninen / Yle

Aktiivvat geahččalit váikkuhit ruvkelága ođasmahttimii

Sullii mánotbadji dassái Minna Näkkäläjärvi ovttas sáttagottiin geigii birasministtar Krista Mikkonenii 37 000 nama adreassa, mii vuostálastá ruvkeplánaid Giehtaruohttasa duoddariidda.

Näkkäläjärvi muitala, ahte sin aktiivajoavku geahččala vel váikkuhit ruvkelága ođasmahttimii. Birasministeriijas sáttagoddi fidnii buori vuostáiváldima, ja danin Näkkäläjärvi lohká leat nana jáhku dasa, ahte Giehtaruohttasii ruvkket eai boađe.

– Mus lea nana jáhkku birasministara sániide ja váikkuhanváldái, Näkkäläjärvi muitala.

Minna Näkkäläjärvi pani alulle adressin Käsivarren tuntureiden puolesta kaivostoimintaa vastaan.
Eanodatlaš Minna Näkkäläjärvi lea giđa rájes bargan dan ovdii, ahte Giehtaruohttasii ii boađášii ruvkedoaibma. Son muitala, ahte dárkkuhus lea maid váikkuhit ruvkeláhkii. Govva: Linda Tammela / Yle

– Dábálaš olmmožin das ii leat nu beare olu, maid sáhttá eará dahkat, go geahččaladdat fal váikkuhit buot vugiiguin dáidda láhkaválmmaštallamiidda, árvala Näkkäläjärvi.

Dálá ruvkeláhka vázzá Näkkäläjärvi mielde máŋgga rievtti ja ealáhusa badjel, danin son vuordáge stuorra nuppástusaid láhkii. Giehtaruohttasa aktiivvat eai leat heaitán bargamis ruvkelága ektui, vaikko adreassa leage juo geigejuvvon.

– Iihan Suomas sáhte leat dakkár láhka, mii manná buot badjel, Näkkäläjärvi dadjá dálá lágas.

Eanodatlaš Minna Näkkäläjärvi lohká, ahte vuostálastinbargu ja namaid čoaggin ii leat mihkkege unna proseassa, baicce measta juo ollesbeaivve bargu. Sus lea nana luohttámuš birasministtárii, geainna deaivvadedje Helssegis, go geigejedje sáttágottiin sutnje Ii ruvkkiid Giehtaruohttasa duoddariidda -adreassa. Jietna: Anja Kaarret / Yle

Varrasamosat: Sápmi

Váldoođđasat

Varrasamosat

Muualla Yle.fi:ssä