Sápmi |

Guldal jiena: Sápmelašvuohta viidát oidnosii Oulus – kulturoaivegávpotjagi plánen juo olles fárttain jođus

Davvi-Suoma stuorámus gávpot ja maid stuorra universiteahtagávpot Oulu válljejuvvui gieskat EU kulturoaivegávpogin jahkái 2026. Ávvojagi doaimmaid leat juo olles fárttain plánemin ja sápmelašvuohta galgá maid viidát oidnot.

Sigga-Marja Magga
Oulu Sámit -searvvi ságajođiheaddji Sigga-Marja Magga lea smiehttagoahtán sámesisdoaluid Oulu kulturoaivegávpotjahkái. Govva: Niila Magga

Mot sámekultuvra boahtá oidnot Oulu kulturoaivegávpotjagi? Sigga-Marja Magga muitala. Jietna: Sáárá Seipiharju / Yle

Go Oulu moadde jagi dassái ráhkkanišgođii ohcat kulturoaivegávpogin, maiddái guovllu sámiid dáhtto fárrui dán bargui hábmet temáid sámesisdoaluin dien jagi áigge.

Nuba Oulu sámesearvvis álge dalán bargui. Nu Oulu Sámit -searvvi ságajođiheaddji Sigga-Marja Magga go Giellagas-instituhta hoavda Anni-Siiri Länsman smiehttagođiiba vejolašvuođaid.

Jagis 2014 Ubmi Ruoŧas ja 2024 Bådåddjo Norggas ledje kulturoaivegávpogin ja nuba doppe sáhtii maid ohcalit jurdagiid sámedoaimmain. Nugo Oulu, de maid dát gávpogat leat mearkkašahtti studeanttagávpogat, ja danin oahppan lea okta temá, mii Oulus šaddá loktejuvvot bajás.

Davvi-Suoma stuorámus gávpot Oulu válljejuvvui gieskat EU kulturoaivegávpogin jahkái 2026.

Vuordimis sierra kulturvahkku

Nu Ubmis go Bådådjos kulturoaivegávpotjagi áigge dolle sierra sámevahku. Logemat jagi dassái maid Oulus ledje Poro Feria -márkanat ja sámekulturvahkku. Sigga-Marja Magga mielde dát sáhtašii leat okta jurdda, mii doaimmašii maid Oulu ávvojagi áigge.

– Dat lei stuorra vahkku, ja dasa boahtá sierra prográmma boahttevuođas. Ubmi ja Bådådjo sámiin leat juo gullan ollu buriid jurdagiid dakkára lágideamis.

Sigga-Marja Magga lasiha, ahte Oulu Sámit leat doaibman juo 20 jagi ja Giellagas-instituhtas leamašan dehálaš sajádat sámekultuvrra ovdanbuktimis ja dovddusin dahkamis Oulus.

– Dáppe lea muđuige beroštupmi, ahte mii ovddidat sámekultuvra oidnoma, son deattuha.

Sáhká lea stuorra dáhpáhusas ja dan galgá álgit áiggil jo ordnestallat, árvala Magga.

– Buot deháleamos lea oažžut sápmelaččaid doaibmagoahtit váhá eambo kultuvrra ovdii, ja buot kulturdoaibma galgá oažžut obalohkái ođđa sajádaga gávpogis. Oažžut maid sápmelaččaid oidnosii dáppe ja searvvi doaimma maid virkkosmuvvat.

Dál Oulu sámesearvvis leat valjis barggut ovddabealde. Áiddo mii jo mo galgá šaddat, ii leat vel áibbas čielggas, muhto vuordámušat leat badjin ja buohkat jáhkket, ahte šaddet oalle somás doalut. Ja seammás besset oaidnit ollu olbmuid.

– Orru ahte jahki 2026 lea guhkkin, muhto áigi hurgá jođánit ja galgá álgit áiggil plánet, deattuha Sigga-Marja Magga Oulus.

Yle Ođđasiid Sámis ja Beaivvi ságaid sáhtát maid guldalit Yle Areenas.

Varrasamosat: Sápmi

Váldoođđasat

Varrasamosat

Muualla Yle.fi:ssä